د کابل پولي تخنیک پوهنتون د محصلینو لپاره دینی ـ اصلاحی سیمینار پیل شو.
د کابل پولي تخنیک پوهنتون د دعوت او ارشاد آمریت لخوا د محصلینو د دینی پوهاوي د لوړوالي، د اسلامي ارزښتونو د پیاوړتیا او د قرآني او نبوي لارښوونو پر بنسټ د اصلاحی پیغامونو د وړاندې کولو په موخه یو دینی ـ اصلاحی سیمینار پیل شوی دی.
د سیمینار په پیل کې ښاغلي شیخ الحدیث احسان الله د انسان او نړۍ د پیدایښت په اړه د قرآن کریم او نبوي احادیثو له مخې یوه علمي او مستنده وینا وړاندې کړه.
نوموړي د قرآن کریم له آیتونو په استفادې د انسان د پیدایښت مرحلې، د اسمانونو او ځمکې پیدایښت او د کایناتو دقیق نظم په هر اړخیز ډول تشریح کړل، او ټینګار یې وکړ چې د انسان له لوري د خالق پېژندنه او د پیدایښت د هدف درک، د فردي او ټولنیز اصلاح لومړنی ګام دی.
د سیمینار په دویمه برخه کې دوکتور شیخ نقیب الله چې د عبدالله بن مسعود د جامعې استاد دی د "قرآن کریم محرمات" تر عنوان لاندې مفصل بحث وړاندې کړ.
نوموړي د قرآني آیتونو په رڼا کې ستر ګناهونه او اخلاقي ـ ټولنیزې محرمات بیان کړل او محصلین یې له دې کړنو څخه د ځان ژغورنې او د الهي احکامو د پیروي کولو پر اهمیت پوه کړل.
هغه زیاته کړه چې د الهي حدودو رعایت نه یوازې د فرد د نیکمرغۍ لامل ګرځي، بلکې د ټولنې د اصلاح تضمین هم بلل کېږي.
د یاونې وړ ده چې دا سیمینار د کابل پولي تخنیک پوهنتون د دعوت او ارشاد آمریت لخوا تنظیم شوی او د څلور ورځو لپاره به دوام ولري.
