کابل پولي تخنیک پوهنتون کې د اورلګېدنې د مخنیوي روزنیز سیمینار ترسره شو
۱۲ ذوالقعدة الحرام ۱۴۴۷ هـ.ق // د ۱۴۰۵ هـ.ش د ثور ۹ مه
د اورلګېدنې د مخنیوي او د اور مهارولو په موخه جوړ سیمینار د کورنیو چارو وزارت د طبیعي پېښو پر وړاندې د مبارزې او اطفائیې عمومي ریاست د نظارت او ارزونې ټیم له لوري په کابل پولي تخنیک پوهنتون کې ترسره شو، چې پکې د پوهنتون رهبري پلاوي، استادانو، کارکوونکو، اداري پرسونل او محصلانو ګډون درلود.
د علمي چارو مرستیال دوکتور ضیاءالرحمن مشک عالم زوی د کورنیو چارو وزارت د طبیعي پېښو د رسېدنې او اطفائیې عمومي ریاست له همکارۍ او هڅو څخه د مننې ترڅنګ، د پېښو پر وړاندې د مخنیوي تدابیرو پر اهمیت د اسلام د سپېڅلي دین د لارښوونو په رڼا کې، هر اړخیزې خبرې وکړې.
وروسته د طبیعي پېښو د رسېدنې او اطفائیې عمومي ریاست ټیم د اورلګېدنې د رامنځته کېدو لاملونو، د اور د مخنیوي اغېزمنو لارو او د اور د کنټرول او مهار طریقو په اړه هر اړخیز معلومات وړاندې کړل.
هغوی په اداري او اکاډمیکو چاپېریالونو کې د اورلګېدنې د عمده لاملونو په تشریح سره، د خوندیتوب اصولو پر مراعت، د برقي او ګازي وسایلو پر سم استعمال او د اور اخیستونکو موادو پر خوندي ساتنه ټینګار وکړ.
همدارنګه ګډونوال په عملي ډول د اور د مخنیوي له ابتدایي طریقو، د اطفائیې وسایلو د کارولو له طریقې او د پېښې پر مهال د چټک غبرګون له څرنګوالي سره بلد شول او د اورلګېدنې د پراخېدو د مخنیوي او احتمالي زیانونو د کمولو لپاره عملي او د پلي کېدو وړ لارې چارې ورسره شریکې شوې.
د یادونې وړ ده چې دغه روزنیز سیمینار د کابل پولي تخنیک پوهنتون د کارکوونکو چارو آمریت په همغږۍ او همکارۍ پلان شوی و.
