د کابل پولي تخنیک پوهنتون د پوهنځیو ترمنځ د والیبال ۱۱م پړاو سیالۍ پیل شوې
د پرانیستې مراسم د قرانکریم د مبارکو آیاتونو په تلاوت سره پیل شول.
د دې سیالیو د پرانیستې په مراسمو کې د کابل پولي تخنیک پوهنتون مشرتابه، استادانو، د اداري څانګو یو شمیر آمرینو، محصلینو او میلمنو ګډون کړی و.
د کابل پولي تخنیک پوهنتون د ورزشي چارو آمر ښاغلي احمد فایق ضیایي د دغو سیالیو پیلول د محصلینو د ورزشي استعدادونو د ودې لپاره یو ارزښتناک ګام وباله او ټولو ورزشکارانو ته يې سپارښتنه وکړه، چې د ورزش ترڅنګ خپلو درسونه او نورو مسؤلیتونو ته هم پام وکړي.
نوموړي د دغه پوهنتون له مشرتابه سره په همغږۍ په بېلابېلو ورزشي برخو کې د محصلینو د استعدادونو د ودې لپاره د زمینې برابرولو ژمنه وکړه.
د يادونې وړ ده، چې دغه سيالۍ د کابل پولي تخنيک پوهنتون د ورزشي چارو آمریت له خوا پلان شوې دي چې لس ورځې به دوام کوي او د ترسره کولو موخه یې د کابل پولي تخنیک پوهنتون د والیبال منتخبې لوبډلې ته د تکړه لوبغاړو تاکل دی.
