د کانونو او پټرولیم وزارت د متخصصینو او د کابل پولي تخنیک پوهنتون د استادانو ترمنځ د همکاریو په موخه غونډه ترسره شوه.

د غونډې په پیل کې د کابل پولي تخنیک پوهنتون عمومي رئیس مولوي محمد موسی فاروق د کانونو او پټرولیم وزارت متخصصینو ته د ښه راغلاست وینا ترڅنګ د دې پوهنتون علمي او تخنیکي رول د هېواد د بنسټیزو سکتورونو په پرمختګ کې مهم وباله.

ښاغلي فاروق وویل: دا ډول ناستې د علمي بنسټونو او د سکتوري ادارو ترمنځ د همکاریو د پراختیا لپاره ارزښتناکې او مؤثرې دي.

وروسته د کانونو او پټرولیم وزارت یو تن متخصص د غونډې اصلي هدف د پوهنتون له استادانو سره د پالیسۍ د ترتیب په برخه کې د همکاریو غوښتنه یاده کړه.

نوموړي زیاته کړه چ ياد وزارت غواړي د کابل پولي تخنیک پوهنتون د استادانو له علمي تجربو څخه په ګټې اخیستنې، یوه دقیقه، علمي او عملي ستراتیژي د هېواد د طبیعي زیرمو د مدیریت لپاره جوړه کړي.

د کانونو او پطرولیم وزارت لخوا د پالیسۍ د ترتیب لپاره مهم ټکي د افغانستان صنعتي کول د کانونو له لارې، د کانونو لومړیتوب بندي، د اکتشاف، استخراج او پروسس لپاره میکانیزم او مرحلې ټاکل، د خلکو لپاره د کار زمینې برابرول، د ملي عوایدو لوړول او د دولت بودیجې تمویل دي.

د غونډې په وروستۍ برخه کې د کابل پولي تخنیک پوهنتون استادانو لاندې مهم وړاندیزونه وړاندې کړل:

• د هېواد د کانونو علمي پیژندنه او لومړیتوب بندي.

• د کوچنیو کانونو څخه د استخراج پیل په دوامداره ډول. 

• په اوسپنیزو کانونو ځانګړی تمرکز او پانګونه.

• د کانونو قراردادونه دې خصوصي او دولتي سکتور ته په شفاف ډول وسپارل شي.

• په پخوانیو قراردادونو بیا کتنه او دقیق نظارت. 

• د متخصصینو، کانونو او پټرولیم وزارت، پولي تخنیک پوهنتون او نورو ذیدخلو ادارو څخه ګډه کمېټه دې جوړه شي ترڅو دغه پالیسي عملي شي.

یاده ناسته د کابل پولي تخنیک او یاد وزارت ترمنځ د لا نږدې همکاریو پیل وګڼل شوه او د هېواد د علمي او اقتصادي پراختیا لپاره یو ارزښتناک ګام وبلل شوه.

غونډه د دعایې په ویلو سره پای ته ورسېده.