د کابل پولي تخنیک پوهنتون مالي او اداري معاونیت، د پوهنځيو رئیسانو او د ډیپارټمینټونو له آمرینو سره د هماهنګۍ غونډه ترسره شوه
غونده د قرآنکریم د مبارکو آیاتونو په تلاوت سره پیل شوه.
لومړی د کابل پولي تخنیک پوهنتون مالي او اداري مرستیال ښاغلي مولوي محمد یاسین حقاني د غونډې ګډونوالو ته د ښه راغلاست وینا ترڅنګ د تېرو غونډو د پرېکړو او کړنو په اړه معلومات وړاندې کړل.
ښاغلي حقاني په خپل راپور کې د ساتنې، څارنې او خدماتو آمریت اړوند پروژو چې د پوهنتون د بیلابیلو برخو رنګمالي، د لیلیې او نورو برخو د تشنابونو ترمیمول، د ایزوګام اچولو او د اوبو رسولو قطریې سیسټم پروژو د طی مراحلو په اړه معلومات وړاندې کړل او نوموړي د یو شمېر هغو پروژو په هکله هم معلومات شریک کړل چې په راتلونکي کې به په لاره اچول کیږي.
همدارنګه شاغلي حقاني د خپلو خبرو په دوام د پوهنتون د توکو د ثبت لپاره د کمېټې د ګمارنې د طرزالعمل، د عمومي ډیپو د توکو تصفیې، د لیلیې د ډیپو د تنظیمولو او د پوهنتون د اوبو د ستونزو د حل په اړه هر اړخیزې خبرې وکړې.
ورپسې د پوهنځیو رئیسانو او یو شمېر استادانو د یاد معاونیت هڅې وستایلې او تر څنګ یې خپل نظریات او وړاندیزونه شریک کړل ترڅو په راتلونکي کې د کارونو د برمختګ لپاره په نظر کې ونیول شي.
غونډه د دعایې په ویلو سره پای ته ورسید.
