د کابل پولي تخنیک پوهنتون د محصلینو د فراغت او نویو شامل شویو محصلینو ته د ښه راغلاست غونډه ترسره شوه

غونډه د قرآنکریم د مبارکو ایاتونو په تلاوت سره پیل شوه.
د کابل پولي تخنیک پوهنتون عمومي رئیس ښاغلي  پوهنوال دیپلوم انجنیر عبدالرشید اقبال نويو محصلینو ته د ښه راغلاست وینا او فارغ شویو  محصلینو ته یې مبارکي وویله او له دوی څخه یې  وغوښتل، چې په ټولنه کې له خپلو مسوولیتونو څخه خبر شي او خپلي دندې په ښه ډول سر ته ورسوي.
ښاغلي اقبال د خپلو خبرو په دوام له فارغ شویو محصلینو څخه وغوښتل چې له پوهنتون سره په اړیکه کې پاتې شي او هڅه وکړي چې په دغه پوهنتون کې د ماسټرۍ دورې ته دوام ورکړي.
ورپسې د لوړو زده کړو وزارت د دولتي محصلانو چارو رئیس ښاغلي استاد محمد یعقوبي فارغ شویو محصلانو ته د فراغت مبارکي ورکړه او تر څنګ یې نویو محصلینو ته د ښه راغلاست وینا وکړه.
ښاغلي  یعقوبي د  خپلو خبرو په  دوام  وویل: نوي محصلین باید لویو موخو ته د رسیدو په نیت زده کړې وکړي او د دوی هدف نه یوازې د فراغت سند ترلاسه کول وي، بلکې د وخت په سمه توګه په کارولو سره خپل راتلونکی په نظر کې ونیسي.
همدارنګه د لوړو زده کړو وزارت د محصلینو د انسجام رئیس ښاغلي  قاضي کلیم الله محمدي محصلینو او د هغوی کورنیو ته د فراغت مبارکي وویله او هغوی یې د خپلي کورنۍ، د افغانستان د خلکو او اسلامي امت په وړاندې د خپلو مسوولیتونو ته متوجه کړل او له هغوی یې وغوښتل چې خپل مسوولیتونه په صادقانه توګه سرته ورسوي.
همدارنګه ښاغلي  انجنیر  نعمت الله پکتیاوال د فارغو شویو محصلینو په استازیتوب ژمنه وکړه، چې ولس او هیواد ته به په پوره صادقانه توګه خدمت کوي او په ټولنه کې به خپل مسوولیتونه په ښه توګه سرته رسوي.
په اخیر کې مراسم د ستاینلیکونو او ډالیو په ویشلو او د دعایې په ویلو  سره پای ته ورسیدل.