کابل پولي تخنیک پوهنتون کې په نړیوالو ژورنالونو کې د څیړنو میتودولوژي او مقالو لیکلو په اړه په اړه څلور ورځنی ورکشاپ پیل شو.

ورکشاپ د قرانکریم د څو مبارکو آیاتونو په تلاوت سره پیل شو

د ورکشاپ پرانیستې مراسمو کې د کابل پولي تخنیک پوهنتون رهبري، د پوهنځیو رئیسانو او استادانو ګډون کړی و

لومړی د کابل پولي تخنیک پوهنتون د څیړنو او علمي مجلې مرستیال دکتور  وثیق الله عربزاده ټولو ته ښه راغلاست وویل او ترڅنګ يې د یاد ورکشاپ د اهدافو او محتوا په اړه په مفصل ډول خبري وکړې.

نوموړي له ټولو استادانو وغوښتل چې په ورکشاپ کې په فعاله توګه برخه واخلی او له دې فرصت څخه د خپلو علمي او څېړنیزو وړتیاوو د لوړولو لپاره ګټه پورته کړي او ټینګار یې وکړ چې په داسې ورکشاپونو کې اغېزمن ګډون کولای شي د پوهنتون له علمي ودې او پرمختګ سره هم مرسته وکړي

ورپسې پروفیسور دکتور عبدالحلیم زریاب په نړیوالو ژورنالونو کې د څیړنو میتودولوژي او مقالو لیکلو په اړه هر اړخیز پریزنټیشن وړاندې کړ..

ښاغلي زریاب په یاد پریزنټیشن کې، د تخنیکي او ساینسي مقالو د سم جوړښت، د څیړنو د میتودونو انتخاب او د معلوماتو تحلیل کولو څرنګوالي په اړه پر مهمو ټکو بحث وکړ

هغه د باوري سرچینو په  کارولو او د پایلو په روښانه کولو کې د احتیاط په اهمیت ټینګار وکړ ترڅو تخنیکي او ساینسي مقالې د منلو وړ وي، چې په نړیوالو ژورنالونو کې خپري شي.