د کابل پولي تخنیک پوهنتون د استادانو لپاره د ظرفیت لوړولو ورکشاپ د رهبرۍ ترعنوان لاندي دائرشو
په دې ورکشاپ کې د کابل پولي تخنیک پوهنتون لپاره د لوړو زده کړو وزارت ځانګړي استازي او د مالي او اداري چارو مرستیال ښاغلي انجنیر زیارمل خطاب، د کابل پولي تخنیک پوهنتون عمومي رئیس ښاغلي پوهنوال دیپلوم انجنیرعبدالرشید اقبال، علمي مرستیال ښاغلي پوهنوال دیپلوم انجنیر محمد نسیم نسیمي، د پوهنځيو رئیسانو او استادانو ګډون کړی و.
لومړی د دغه پوهنتون د استادانو د مسلکي پراختیا آمر ښاغلي پوهنمل محمد یونس وفا د دغه ورکشاپ د جوړیدو اجنډا او موخه تشریح کړه.
ورپسې د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال ټولو ګدونوالو ته ښه راغلاست ووایه او زیاته یې کړه چې، د استادانو د مسلکي او علمي ودې په موخه د دا ډول پروګرامونو ترسره کول ګټور، آغیزمن او مهم دي او د دغه ورکشاپ له تنظیموونکو څخه یې مننه وکړه او په پرله پسې توګه یې د هیواد په دننه او بهر کې د دغه پوهنتون د علمي نوښتونو او لاسته راوړنو څخه یادونه وکړه.
همدارنګه د لوړو زده کړو د وزارت ځانګړي استازي د مالي او اداري چارو مرستیال ښاغلي انجنیر زیارمل خطاب ټولو ته ښه راغلاست ووایه او د پوهنتون په کچه یې د داسې پروګرامونو ترسره کولو نه خوښي څرګنده کړه.
نوموړي د دغو پروګرامونو ترسره کول د استادانو د علمي او مسلکي ودې په موخه نوښت او لاسته راوړنه وګڼله او د کابل پولي تخنيک پوهنتون مشرتابه، استادانو او مسوولينو ته يې د دغه ډول پروګرامونو د ترسره کولو له امله مبارکي وويله دغه راز ښاغلي خطاب په خپلو راتلونکو پلانونو کې په دغه پوهنتون کې د دوکتورا پروګرام جوړول او د کانونو د مدیریت تر عنوان لاندی د ملی کنفرانس د دائریدو يادونه وکړه.
همدا راز پوهنوال ډاکټر امان الله فقیري د ورکشاپ ټولو ګډونوالو ته د ښه راغلاست ترڅنګ د رهبري په اړه د یو چمتو شوې پریزنتیشن له لارې د رهبرۍ د ځانګړتیاوو، طریقو او له مدیریت سره د هغه د توپیرونو په اړه مفصل معلومات ورکړل. چې، د ګډونوالو له خوا یې تود هرکلی وشو.
