کابل پولي تخنيک پوهنتون کې د اسلامي بانکدارۍ د عامه پوهاوي سيمينار د افغانستان اسلامي بانک له لوري ترسره شو
د کابل پولي تخنيک پوهنتون د محصلانو چارو مرستيال انجنير مفتاح الدين عزام د سیمینار په پیل کې له محصلانو وغوښتل چې د خپلو مسلکي درسونو تر څنګ دې د اسلام ټولنيز، سياسي، اقتصادي او اخلاقي نظام په برخو کې هم ازادې مطالعې ته پاملرنه وکړي. نوموړي همدارنګه ټينګار وکړ چې محصلان دې يوازې په درسي مطالبو بسنه ونه کړي، بلکې د لا زياتې هڅې او زحمت له لارې دې خپل علمي او فکري کچه داسې لوړه کړي چې وکولای شي د ټولنې اړتياوې او تمې په بېلابېلو برخو کې په اغېزمن ډول پوره کړي.
همدارنګه، د افغانستان اسلامي بانک شرعي سلاکار محب الله شريفي د اسلامي بانکدارۍ نظام ارزښت ته په اشاره وویل، چې دا د نړۍ له تر ټولو ډېر کارېدونکو بانکي نظامونو څخه بلل کیږي. نوموړي زیاته کړه چې د ا.ا.ا له حاکميت وروسته په بانکونو کې ټول سودي معاملات درول شوي او په نږدې راتلونکي کې به ټول بانکونه د اسلامي بانکدارۍ د فعاليت جوازونه ترلاسه کړي.
د سيمينار په دوام کې ادريس حماد د يوې هر اړخيزې پرېزنټېشن له لارې د اسلامي بانکدارۍ سيستم تشريح کړ، د دې نظام اساسي اصول او له دوديز بانکدارۍ سره يې توپيرونه بيان کړل. وروسته يې د حسابونو ډولونه (جاري، سپما او پانګونې) او بانکي خدمتونه هم روښانه کړل.
محترم حماد د تمويل مالي لارې لکه مضاربه، مشارکت، مرابحه او اجاره د روښانو څرګندونو او عملي بېلګو په وړاندې کولو سره تشريح کړې.
سيمينار د محصلانو د پوښتنو په ځوابولو او د دعايې په ویلو سره پای ته ورسېد.
