په کابل پولي تخنیک پوهنتون کې د څیړنې میتودولوژي او په ساینسي څیړنو کې د مصنوعي ځیرکتیا د اهمیت په اړه ورکشاپ جوړ شو.
ورکشاپ د قرآنکریم د مبارکو آیاتونو په تلاوت سره پیل شو.
یاد ورکشاپ چې د څیړنیزې میتودولوژي او په څیړنو کې د مصنوعي ځیرکتیا اهمیت په اړه ترتیب شوی و، اصلي هدف یې د علمي څیړنو د طریقو او په څیړنو کې د مصنوعي ځیرکتیا کلیدي رول سره د استادانو
آشنا کولو او د علم او څیړنې په برخه کې د څیړنیزو مهارتونو پرمختګ او د نوې ټکنالوژۍ کارول دي.
په پیل کې د کابل پولي تخنیک پوهنتون د عمومي ریاست سرپرست رئیس ښاغلي انجنیر سردار ولي صالحي په علمي څیړنو کې د مصنوعي ځیرکتیا په اهمیت هر اړخیزې خبرې وکړې او له استادانو یې غوښتنه وکړه چې په دې برخه کې مخکې لاړ شي، له یادو فرصتونو څخه په بشپړ توګه استفاده وکړي او په دې ورکشاپ کې فعال ګډون وکړي.
همدا راز د څیړنو او علمي مجلې معاون ښاغلي دوکتور وثیق الله عرب زاده د هم د مصنوعي ځیرکتیا په اړه خبرې وکړې او په علمي څیړنو کې یې د مصنوعي ځیرکتیا کارول ضروري وبلل ترڅو د نوې ټکنالوژۍ په پرمختګ سره علمي څیړنې وده وکړي.
نوموړي په نږدې راتلونکي کې د نورو علمي پروګرامونو د ترسره کیدو یادونه هم وکړه.
د یادونې وړ ده چې دغه ورکشاپ په دوو دورو کې د استادانو د مسلکي پراختیا په موخه د پوهنتون د مسلکي پراختیا آمریت لخوا تنظیم شوی او د دوکتور مجتبی امین لخوا به یې د تدریس چارې مخته وړل کیږي.
