د کابل پولي تخنيک پوهنتون د ماسټرۍ برنامو لومړی پړاو ازموینه د ازموينو عمومي ادارې له لوري واخيستل شوه
د کابل پولي تخنيک پوهنتون د ماسټرۍ برنامو ازموینه د ازموينو عمومي ادارې له لوري په بشپړ شفاف، منظم او د ازموينو د اصولو او کړنلارو په مراعتولو سره واخيستل شوه.
په دې پړاو کې د اتوميخانیک انجينرۍ، سروې انجينرۍ، جيولوجۍ او د کانونو د اکتشاف انجينرۍ، پټروليم انجينرۍ، هايدروجيولوجۍ او جيولوجۍ، ښاري پلان جوړونې او ډيزاين، او د ودانيو انجينرۍ د څانګو له نوماندانو څخه ازموينه واخيستل شوه.
د ازموينې د بهير پر مهال د کابل پولي تخنيک پوهنتون د رهبرۍ پلاوي او د ازموينو عمومي ادارې مسئولينو د ازموينې له جريان څخه ليدنه وکړه او ګډونوالو ته يې ډاډ ورکړ چې دغه ازموينه په بشپړ شفاف، عادلانه او منظم ډول، د ازموينو عمومي ادارې د اصولو او کړنلارو سره سم ترسره کېږي.
د يادونې وړ ده چې د برېښنا انجينرۍ، د نفت او ګاز د کيمياوي صنايعو انجينرۍ، د هايډروليکي جوړښتونو انجينرۍ، د اوبو د سرچينو هر اړخيز مديريت، ترانسپورټېشن انجينرۍ، د ودانيو ساختماني انجينرۍ او د ساختماني مديريت انجينرۍ د څانګو د نوماندانو د بايومتريک معلوماتو د ثبت بهير به د پنجشنبې په ورځ ترسره شي او د دغو څانګو ازموينه به د ۱۴۰۵ کال د اسد په ۲مه، د جمعې په ورځ د ملي ازموينو ادارې له لوري واخيستل شي.
۱۴۰۵ د سرطان ۳۰
۱۴۴۸ د صفرالمظفر ۶
۲۰۲۶ د جولای ۲۱
