د کابل پولي تخنیک پوهنتون کې د څیړنې د نویو میتودونو تر عنوان لاندې لومړی درې ورځنی ژمني ورکشاپ پرانیستل شو.
ورکشاپ د قرانکریم د مبارکو آیتونو په تلاوت سره پیل شو.
دغه ورکشاپ کي د پولي تخنیک پوهنتون لپاره د لوړو زده کړو وزارت ځانګړي استازي ښاغلي انجینر زیارمل خطاب، د کابل پولي تخنیک پوهنتون عمومي رئیس ښاغلي پوهنوال عبدالرشید اقبال،علمي مرستیال ښاغلي پوهنوال دیپلوم انجنیر محمد نسیم نسیمي، د پوهنځیو رئیسانو او استادانو ګډون درلود.
د غونډې په پیل کې د استادانو د مسلکي ودې د مرکز آمر پوهنمل محمد یونس وفا ټولو ته ښه راغلاست ووایه او د استادانو د مسلکي ودې په برخه کې یې د دغه پروګرام د موثریت او ګټورتوب په اړه خبرې وکړې، د پروګرام اجنډا یې ولوستله او په دې برخه کې یې د استادانو د همکارۍ غوښتنه وکړه.
ورپسې د پولي تخنیک پوهنتون لپاره د لوړو زده کړو وزارت ځانګړي استازي ښاغلي انجینر زیارمل خطاب د استادانو د مسلکي ظرفیت د لوړولو په برخه کې د دا ډول پروګرامونو په ترسره کولو خوښي څرګنده کړه. او په دې اړه یې د دوی د هڅوپه اړه وویل چې د کابل پولي تخنیک پوهنتون باید د هېواد د پوهنتونونو په منځ کې په ځانګړي توګه د نړۍ په کچه په څېړنیزو او علمي څانګو کې د یو معتبر پوهنتون په توګه وپېژندل شي. او دا ډول څیړنیزو پروګرامونو ترسره کول، د نویو سرچینو او نویو څیړنیزو میتودونو لارښود کول د پورتنیو موخو د ترلاسه کولو لپاره یو له میتودونو څخه وګانه.
نوموړي دغه راز په علمي او څېړنيزو څانګو کې د متقاعد شویو استادانو او علمي تجربو د شريکولو په موخه د يوې کمېټې د جوړېدو په اړه خبرې وکړې او د دا ډول پروګرامونو د دوام او همکارۍ غوښتنه يې وکړه.
اوهمدارنګه نوموړي په دې برخه کې د څېړنيزو څانګو د استادانو د همکاريو د دوام غوښتنه وکړه . او دا رنګه پروګرامونه ئي په علمي څانګو کي یو مسؤلیت وګانه.
همدا راز د کابل پولي تخنیک پوهنتون عمومي رئیس عبدالرشید اقبال تدریس او څیړنه د پوهنتونونو دوه بنسټيزﯤ دندې وبللې او د څېړني اهمیت يي په ټولنه کي د ستونزو د حل په موخه لازم توضیحات ورکړل او ګډونوالو ته یې په دې ډول ورکشاپونو کې د نظریاتو او بحثونو غوښتنه وکړه او د بریالیتوب هیله یې وکړه.
د پروګرام په وروستي برخه کي پوهاند محمد نذیر نجابي د ورکشاپ له ټولو ګډونوالو څخه مننه وکړه او وه ئې ویل، چې د ورکشاپ له جوړیدو یې موخه د استادانو ترمنځ د زده کړو، افکارو او تجربو تبادله ده.او د نوي څيړنيز ميتود په باره کې د چمتو شويو سلایډونو په اړه تفصيلي پريزينټيشن وړاندې کړ.
