د کابل پولي تخنیک پوهنتون علمي شورا غونډه تر سره شوه.

غونډه د قرآنکریم د مبارکو آیاتونو په تلاوت سره پیل شوه.

په پیل کې د کابل پولي تخنیک پوهنتون د عمومي ریاست سرپرست رئیس

ښاغلي انجنیر سردار ولي صالحي د ښه راغلاست او پیلیزې وینا ترڅنګ د اجنډا مطابق په بېلابېلو علمي او اکادمیکو موضوعاتو خبرې وکړې.

نوموړي د پوهنتون د بېلابېلو برخو ترمنځ د همغږۍ او همکارۍ د اهمیت په اړه یادونه وکړه او د علمي شورا ټولو غړو څخه یې وغوښتل چې د پوهنتون د علمي کچې او تعلیمي کیفیت د لوړولو لپاره کار هر اړخیزې هڅې وکړي.

د غونډې په دوام سره د اړوند معاونیتونو د ۱۴۰۳ مالي کال د درېیمې ربعي ترسره شویو کارونو راپور وړاندې او د ویب سایټ کمیټې د تطبیقي پلان تفصیلي راپور هم شریک شو.

د دې ترڅنګ د HEMIS مديريتي سیستم د پلي کولو، د استادانو تقرر او انفکاک او نورو مختلفو موضوعاتو په اړه هم بحث او نظرونه شریک شول.

همدا راز د علمي شورا غړو هر یو د پوهنتون د علمي بهیر د ښه کولو په اړه خپل نظریات او وړاندیزونه وړاندې کړل، چې د همکارۍ زیاتولو، د تدریسي کیفیت لوړولو، د څیړنیزو امکاناتو زیاتولو او د نویو علمي پروګرامونو د پراختیا باندې یې تمرکز درلود.

ښاغلي انجنیر سردار ولي صالحی د نظریاتو د اوریدلو وروسته وویل چې خپل وړاندیزونه او نظریات په عمل کې پلی کړي او د پوهنتون د علمي او اکادمیک بهیر په ښه کولو کې یو بل سره زیاته همکاري وکړئ.

په پای کې د کابل پولي تخنیک پوهنتون د مالي او اداري چارو مرستیال مولوي محمد یاسین حقاني په خپلو خبرو کې د پوهنتون بېلابېلو برخو ترمنځ په زیاتې همغږۍ ټینګار وکړ. ښاغلي حقاني د پوهنځیو له رئیسانو وغوښتل چې د ځواب غوښتونکو مکتوبونو ته په خپل وخت سره ځواب ورکړي تر څو د اجرایي چارو بهیر بې ځنډه پر مخ ولاړ شي.

نوموړي د پوهنتون د مختلفو کمیټو له غړو څخه هم وغوښتل چې په دې کمیټو کې فعال ګډون وکړي.

غونډه د دعایې په ویلو سره پای ته ورسیدل.