د کابل پولي تخنیک پوهنتون رهبرۍ او محصلینو د استازو ترمنځ ستونزو ته د رسیدو په موخه غونډه ترسره شوه

غونډه د قرآنکریم د مبارکو آیاتونو په تلاوت سره پيل شوه.
لومړی د کابل پولي تخنیک پوهنتون سرپرست رئیس ښاغلي انجنیر سردار ولي صالحي د محصلینو له استازو سره د دغه پوهنتون د علمي او اکاډمیک وضعیت د ښه والي په اړه خبرې وکړې.
نوموړي د معاصرې ټکنالوژۍ کارول د پوهې د کچې د لوړولو لپاره مهم وګڼل او محصلینو ته یې سپارښتنه وکړه، چې د هېواد او خلکو د خدمت په لاره کې په اخلاص، تقوا او پرهیزګارۍ لاس پورې کړي او محصلین یې وهڅول، چې له غفلت او وخت ضایع کولو څخه ډډه وکړي، وخت مهم او قیمتي وګڼي او ور څخه مثبته ګټه پورته کړي.
ښاغلي صالحي د خپلو خبرو په دوام کې د لابراتوارونو او تدریسي وسایلو د نشتوالي او کمبود او د دوی د ستونزو د حل په برخه کې د هر اړخیزې همکارۍ ژمنه او ډاډ ورکړ.
دغه راز د کابل پولي تخنیک پوهنتون د محصلانو چارو مرستیال ښاغلي انجينر عنایت الله رحیمی هم په دې غونډه کې د محصلینو او ګډونوالو حضور ته د ښه راغلاست وینا تر څنګ، د محصلينو د ستونزو د حل په اړه خبرې وکړې او د بېلابېلو سکتوري ادارو په مسلکي بستونو کې یې د دغه پوهنتون د محصلینو د استخدام ډاډ ورکړ.
ورپسې د یاد پوهنتون مالي او اداري مرستیال ښاغلي مولوي محمد یاسین حقاني د محصلینو د ستونزو د حل په موخه د پوهنتون له امکاناتو او ظرفیتونو څخه د استفادې په اړه معلومات وړاندې کړل.
نوموړي په پوهنتون کې د محصلینو پر مکلفیتونو هر اړخیزې خبرې وکړې او محصلین یې متوجه کړل چې د دې اکاډمیک ځای په نظم او ساتنه کې هر راز پاملرنه وکړي.
د دې ترڅنګ د کابل پولي تخنیک پوهنتون علمي مرستیال ښاغلي پوهنوال دیپلوم انجنیر عبدالرشید اقبال هم د موضوع په اړه مفصلې خبرې وکړې.
په پای کې د محصلینو استازو خپلي غوښتنې او ستونزي له مسؤلینو سره شریکې کړې چې د پوهنتون د رهبري له خوا ورته د هر اړخیزې همکارۍ ډاډ ورکړل شو.
غونډه د دعایې په ویلو سره پای ته ورسیده.