د کابل پولي تخنیک پوهنتون د پوهنځیو ترمنځ د فوټسال دیارلسم پړاو سیالۍ پیل شوې
د سیالیو لومړني مراسم د قرآنکریم مبارکو آیاتونو په تلاوت سره پیل شوه.
لومړی د کابل پولي تخنیک پوهنتون علمي مرستیال ښاغلي پوهنوال دیپلوم انجنیر عبدالرشید اقبال په يادو شويو سياليو کې د ورزشکارانو له ګډون څخه مننه وکړه، سپورت يې د روغتيا او سلامتيا ضمانت وباله او له ټولو زده کړیالانو يې وغوښتل، چې د ورزش ترڅنګ خپلو زده کړو ته هم پاملرنه وکړي.
ورپسې د کابل پولي تخنیک پوهنتون د ورزشي چارو آمر ښاغلي احمد فایق ضیايي د پوهنځیو ترمنځ د فوټسال ټورنمنټ په اړه معلومات وړاندې کړل او ټولو ورزشکارانو ته یې د بریا هیله وکړه.
همدارنګه د کابل پولي تخنیک پوهنتون د ریاست د دفتر آمر ښاغلي مفتي محمد رفیع هم د اسلام له نظره د سپورت په اړه مفصلې خبرې وکړې او ټولو ورزشکارانو ته یې د بریا هیله وکړه.
د يادونې وړ ده، چې دغه سيالۍ به ١٥ ورځې دوام وکړي او د دې سياليو د ترسره کېدو موخه د کابل پولي تخنيک پوهنتون د فوټسال منتخبې لوبډلې ته د تکړه لوبغاړو ټاکل دي.
