د کابل پولي تخنیک پوهنتون د شپږو پوهنځیو ترمنځ د باسکټبال سیالۍ پای ته ورسېدې

یاد مراسم د همدې پوهنتون د اړیکو او عامه پوهاوي آمر ښاغلي ارسلا مفتون په ویاندویې او د قران کریم په تلاوت سره پیل شول.

دغه مراسمو کې د کابل پولي تخنیک پوهنتون لپاره د لوړو زده کړو وزارت ځانګړي استازي ښاغلي انجینر زیارمل خطاب، د کابل پولي تخنیک پوهنتون عمومي رئیس ښاغلي پوهنوال عبدالرشید اقبال، د باسکټبال فدراسیون سرپرست رئیس ښاغلي عبیدالله ارغندیوال، د سیالیو مدیر عبدالواسع پژمان د پوهنځیو رئیسانو، آمرینو، کارکوونکو اومحصلانو ګډون درلود.

لومړی د کابل پولي تخنیک پوهنتون د سپورت آمر ښاغلي احمد فایق ضیایې ټولو ګدونوالو ته ښه راغلاست ووایه او د کابل پولي تخنیک پوهنتون د هئیت ادارﯤ او د لوړو زده کړو وزارت له ځانګړي استازي څخه یې د سپورت په برخه کې د ځانګړې پاملرنې مننه وکړه. نوموړي زیاته کړه چې، په دې سياليو کې د کیمیاوي صنایعو انجنیري پوهنځي ورزشي ټيم لومړى مقام، د ساختماني پوهنځي ورزشي ټيم دویم مقام او د جیولوجي او کانونو پوهنځي ورزشي ټيم دریم مقام خپل کړ.

ورپسې انجنیر زیارمل خطاب د کابل پولي تخنیک پوهنتون کې د لوړو زده کړو وزارت ځانګړي استازي په علمي بنسټونو کې د دا ډول سیالیو د ترسره کولو ستاینه وکړه. سپورت یې د اسلام د مبارک دین له نظره په مختلفو سطحو تشریح او سپورت یې د تفریح او بدن د پیاوړتیا وسیله وګڼله.نوموړي په خپلو خبروکې وویل چې، د آسونو سواري، د اوبو لوبې، نیزه بازي او څغاست لوبي یې د رسول الله صلی الله علیه وسلم سنتونه دي.

همدا راز د کابل پولي تخنیک پوهنتون عمومي رئیس ښاغلي پوهنوال عبدالرشید اقبال هم ټولو ته ښه راغلاست ووایه او د ورزشکارانو ملاتړ او پیاوړتیا ته یې د اسلامي ا م.ارت له پاملرنې څخه خوښي څرګنده کړه او زیاته یې کړه چې سپورت د بدن پیاوړتیا او زده کړو ته د آماده ګی وسیله ده، د دې ترڅنګ یې ټولو ورزشکارانو ته د بریا هیله وکړه.

همدارنګه د پوهنتون د بشري منابعو آمر قاضي محمد انس د ورزش په برخه کې د نړۍ په پرمختګونو په خاص ډول د اوبولوبو او څغاست لوبو اړوند مفصلې خبرې وکړې او د همدې پوهنتون د باسکټبال ټیمونو هڅې یې وستایلې او دوی ته یې د لا بریا هیله یې وکړه.

یاد مراسم د جایزو او ځانګړو تقدیرنامو په ورکولو سره پاي ته ورسیدل.