د کابل پولي تخنیک پوهنتون د ساختماني پوهنځي د څلورم ټولګي ۳۷ تنه محصلین د عملي کار ترسره کولو په موخه د ملي پراختیا شرکت ته معرفي شول.
د محصلینو د عملي او مسلکي ظرفیتونو د پیاوړتیا په موخه، د کابل پولي تخنیک پوهنتون د ساختماني پوهنځي د څلورم ټولګي محصلین د پوهنمل محمد عالم وردک تر علمي لارښوونې لاندې، د یو میاشتني عملي او پرکتیکي کار لپاره د ملي انکشاف شرکت ته معرفي شول.
دا پروګرام د کابل پولي تخنیک پوهنتون او د ملي پراختیا شرکت ترمنځ د همکارۍ یوه مهمه برخه ده چې هدف یې د نظري زده کړو له عملي تجربو سره نښلول او محصلینو ته د واقعي کاري چاپېریال سره اشنايي ورکول دي.
په دې پروګرام کې شامل محصلین به دا فرصت ولري، چې د ملي پراختیا شرکت په ساختماني پروژو کې فعاله ونډه واخلي، له نوې ساختماني ټکنالوژۍ، عملي بهیرونو او د پروژو له مدیریت سره له نږدې بلد شي.
د کابل پولي تخنیک پوهنتون مشرتابه د ملي پراختیا شرکت له مؤثرې همکارۍ مننه او قدرداني کوي او دا اقدام د محصلینو د علمي او مسلکي ودې په لور یې یو ارزښتناک ګام بولي.
