د کابل پولي تخنیک پوهنتون د استادانو اووه ویشتم دور علمي–میتودیکي کنفرانس پیل شو
۳ د ثور ۱۴۰۵ هـ ش، چې د ۱۴۴۷ هـ ق د ذوالقعدې ۶
د یاد کنفرانس د پرانیستې مراسمو کې د کابل پولي تخنیک پوهنتون رهبري، استادانو او کارکوونکو پراخ ګډون وکړ.
د علمي چارو مرستیال دوکتور ضیاءالرحمن مشک عالم زوی د کنفرانس د محتوا په اړه مفصل معلومات وړاندې کړل او له هغو استادانو څخه یې مننه او قدرداني وکړه چې د خپلو علمي څېړنو له ترسره کولو وروسته یې مقالې د دې کنفرانس د وړاندې کولو لپاره چمتو کړې دي.
نوموړي د علمي کنفرانسونو جوړول مهم او ارزښتناک وبلل او دا یې د علمي څېړنو د بهیر د پیاوړتیا لپاره اغېزمن ګام وباله او په دې برخه کې یې د هر اړخیزې همکارۍ ډاډ څرګند کړ.
همدارنګه د محصلانو چارو مرستیال انجنیر مفتاح الدین عزام څېړنه د علمي او اکاډمیکو چارو د پرمختګ بنسټ وباله او د علمي کنفرانسونو جوړول یې د پوهنتون د علمي او اکاډمیکو فعالیتونو د ودې او پراختیا لپاره مهم او ارزښتناک وبلل نوموړي له استادانو وغوښتل چې د څېړنې فرهنګ عام کړي او د داسې کنفرانسونو له لارې محصلان هم څېړنې او نوښت ته وهڅوی.
د یادونې وړ ده چې دا کنفرانس د څېړنو او علمي مجلې معاونیت په هڅو د کابل پولی تخنیک پوهنتون د شپېتو کلونو علمي او اکاډمیکو خدمتونو د نمانځنې په مناسبت ترسره شوی، چې په ۸ بېلابېلو برخو کې تنظیم شوی او په ټولیز ډول به د دې پوهنتون د استادانو له لوري ۵۳ علمي مقالې پکې وړاندې شي.
د پرانیستې مراسم د دعا په لوستلو سره پای ته ورسېدل او کنفرانس په رسمي توګه پیل شو.
