د کابل پولي تخنیک پوهنتون او کابل سنټر ترمنځ د ګډو همکاریو هوکړه لیک لاسلیک شو
د یاد هوکړه لیک اساسي هدف د دواړو ادارو ترمنځ د ګډو فعالیتونو پیاوړتیا، د محصلینو د ظرفیت لوړونه، د علمي او عملي زدهکړو لپاره مناسب فرصتونه برابرول دي.
د هوکړه لیک له مخې به دواړه اړخونه د علمي او تخنیکي همکاریو د پراختیا، د روزنیزو پروګرامونو او ورکشاپونو د تنظیم او د تجربو د تبادلې په برخو کې ګډ کار ترسره کوي.
د هوکړه لیک پر مهال د کابل پولي تخنیک پوهنتون د محصلانو چارو مرستیال د کابل سنټر انګلیسي ژبې مرکز مسؤلینو ته د مننې او ښه راغلاست تر څنګ په خپلو خبرو کې زیاته کړه چې : ټول خصوصي او امارتي مرکزونه باید د نصابونو په برخه کې د اسلامي او افغاني فرهنګ ترویج ته زیاته توجه وکړي او خپل علمي نصابونه د پردیو فرهنګونو څخه په بشپړ توګه پاک کړي.
د نوموړي په وینا به دغه هوکړه لیک د علمي او تخنیکي پرمختګ لپاره یو مهم ګام ګڼل کېږي، ځکه له دې لارې به محصلین د عملي زدهکړو او مسلکي تجربو فرصتونه ترلاسه کړي او د نوې ټکنالوژۍ او معاصرو زدهکړو سره به بلدتیا پیدا کړي.
د یادونې وړ ده، چې د یاد هوکړه لیک له مخې به کابل سنټر د کابل پولي تخنیک پوهنتون لپاره په انګلیسي برخه کې ۴۰% او د کمپیوټر زده کړي په برخه کې ۳۰% فیصده تخفیف په نظر کې نیولی.
کابل پولي تخنيک پوهنتون تل هڅه کوي چې د محصلینو لپاره د علمي او عملي زدهکړو اسانتیاوې برابرې کړي.
