د هیواد په سطحه د انجنیري او تکنالوژي لومړني نړیوال ژورنال د فعالیت پرانیست غونډه ترسره شوه.
غونډه د قرانکریم د مبارکو آیتونو په تلاوت سره پیل شوه.
په یاده غونډه کې چې، د کابل پولي تخنیک پوهنتون د انجنیري او ټکنالوژي د لومړي نړیوال ژورنال ته د اعتبارنامې ورکولو په موخه جوړه شوې وه د لوړو زده کړو وزارت د رهبري هئیت، د کابل پولي تخنیک پوهنتون مشرتابه، د خصوصي پوهنتونونو رئیسانو او استادانو ګډون درلود.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیرعبدالرشید اقبال د پیل وینا وکړه او د لوړو زده کړو وزارت د مشرتابه پلاوي راتګ ته د هرکلي ترڅنګ يې د کابل پولي تخنیک پوهنتون د نړیوال ژورنال د جوړیدو او په نړیواله درجه بندۍ کې د دغه پوهنتون د شامیلیدو له امله خوښي څرګنده کړه.
ورپسې د کابل پولي تخنیک پوهنتون د نړیوال ژورنال مدیرمسئول ډاکټر احمد جواد نیازي په بېلابېلو علمي برخو کې د علم او څېړنو پر ارزښت خبرې وکړې او د نړیوال ژورنال د جوړولو د څرنګوالي، او د ژورنال د نورو ځانګړتیاوو په اړه يې معلومات وړاندي کړل.
همدارنګه د لوړو زده کړو وزارت علمي معین ښاغلي دوکتور لطف الله خيرخواه په ټولنه کې د تحقیق او څيړنو مقام مهم او ارزښتناک وباله او د ملي او نړیوالو ژورنالونو د ودې او پراختیا په برخه کې یې له دولتې او خصوصي پوهنتونونو سره د هر اړخیزې همکارۍ ژمنه وکړه.
نوموړي د یاد نړیوال ژورنال جوړیدل نه یوازي د کابل پولي تخنیک پوهنتون بلکې د ټول هیواد په سطحه یوه لویه لاسته راوړنه وبلله.
همدا راز د دغه پوهنتون مالي او اداري سرپرست مرستیال ښاغلي سید مصباح الدین هاشمي د نړیوال ژورنال د جوړیدو په برخه کې د ټولو مسئولینو د کړنو ستاینه وکړه.
یاد غونډه د دغه پوهنتون لپاره د لوړو زده کړو وزارت له خوا د نړیوال ژورنال د اعتبارنامې په ورکولو سره پاي ته ورسیده.
