د کابل پولي تخنيک پوهنتون د فوټسال سياليو پنځلسم پړاو چې د بدني اعداد په موخه په لار اچول شوی و، په برياليتوب سره پای ته ورسېد
د کابل پولي تخنيک پوهنتون د فوټسال سياليو د پنځلسم پړاو د پایلوبې مراسم د پوهنتون د رهبرۍ پلاوي، آمرينو، استادانو، د افغانستان اسلامي بانک استازو او يو شمېر محصلانو او د ورزش مينوالو په حضور کې په برياليتوب سره ترسره شول.
د مراسمو په پيل کې د کابل پولي تخنيک پوهنتون د محصلانو چارو مرستيال محترم انجنير مفتاح الدين عزام د ځوانانو په جسمي، فکري او اخلاقي ودې کې د ورزش د ارزښت په اړه خبرې وکړې او له محصلانو يې وغوښتل چې ورزش د نېک او سالم نيت له مخې ترسره کړي؛ ځکه ورزش د خير له نيت سره د الله تعالی د رضا سبب ګرځي او عبادت ګڼل کېږي.
نوموړي همدارنګه څرګنده کړه چې ورزش يوازې د بدني وړتياوو د پياوړتيا لامل نه ګرځي، بلکې د شخصيت په وده، د همکارۍ د روحيې، نظم، انضباط او د ځوانانو د ښو اخلاقو په پياوړتيا کې هم مهم او ارزښتناک رول لري.
ښاغلي عزام له محصلانو وغوښتل چې خپل قوت او توان د مظلومانو د ملاتړ، د ټولنې د خدمت او د اسلامي ارزښتونو د ترويج په برخه کې وکاروي او لکه څنګه چې له فزيکي اړخه وده کوي، خپل اخلاق او چلند هم ښه او منظم وساتي.
ورپسې د افغانستان اسلامي بانک شرعي سلاکار محترم محب الله شريف د اسلام له نظره د ورزش د اهميت په اړه هر اړخيزې خبرې وکړې او ورزش يې د جسم د سلامتيا، د روحيې د پياوړتيا او د ځوانانو د سالمې روزنې يوه مهمه وسيله وبلله.
نوموړي د یادو سياليو په تمويل کې د افغانستان اسلامي بانک له همکارۍ او ملاتړ څخه خوښي څرګنده کړه او د ځوانانو د ملاتړ او د سالمو ورزشي فعاليتونو د ودې په برخه کې يې د دغه بانک ټولنيز خدمات د ټولنيز مسئوليت يوه مهمه برخه وبلله.
د يادونې وړ ده چې د دغو سياليو په دې پړاو کې د جيولوجي او کانونو پوهنځي لومړی، د کيمياوي صنايعو انجينرۍ پوهنځي دويم او د اداري کارکوونکو لوبډلې درېيم مقامونه خپل کړل.
غونډه د اتلولۍ د جام، ستاينليکونو او تحايفو په وېشلو سره پای ته ورسېده.
