د کابل پولي تخنیک پوهنتون لپاره نوی مالي او اداري مرستیال معرفي شو
د معرفت مراسم د قرآنکریم د مبارکو آیاتونو په تلاوت سره پیل شول.
په دې مراسمو کې د لوړو زده کړو وزارت څخه راغلي پلاوي، د کابل پولي تخنیک پوهنتون مشرتابه، استادانو، د اداري څانګو آمرینو او مېلمنو ګډون درلود.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال د ښه راغلاست وینا تر څنګ د ښاغلي مولوي محمد یاسین بهار په ټاکل کیدو خوښي څرګنده کړه او تر څنګ یې ورته د لا بریالیتوب هیله وکړه.
ښاغلي اقبال زیاته کړه: دا د پوهنتون لپاره خورا مهمه او حیاتي برخه ده او د اداري کارونو پر وخت تطبیق د پوهنتون په بریالیتوب کې لوی رول لوبوي.
نوموړي له ټولو اړوند آمرینو وغوښتل چې له مالي او اداري مرستيال سره هر راز همکاري وکړي.
همدارنګه د لوړو زده کړو وزارت د بشري سرچینو رئیس ښاغلي الحاج مولوي سلطان محمد محسن په اداراتو کې تغییر او بدلون یو اصل وباله. دوی د مولوي محمد ياسين بهار د تقرر د منظورۍ مکتوب ولوست او ورته يې د برياليتوب هيله وکړه.
په اخیر کې د کابل پولي تخنيک پوهنتون نوي مالي او اداري مرستيال ښاغلي مولوي محمد ياسين بهار مسووليت يو امتياز نه بلکې د الله ﷻ له طرف یو امتحان وبلی.
ښاغلي بهار په کارونو کې همغږي او د سلسله مراتبو مراعت د دندو د بریالیتوب لپاره مهم یاد کړل، همدارنګ دوی ژمنه وکړه، چې په ورسپارل شویو چارو کې به مسؤل وي او خپلې دندې به په پوره صداقت ترسره کوي.
