د کابل پولي تخنیک پوهنتون او کاردان خصوصي پوهنتون ترمنځ د علمي همکاریو تفاهم لیک لاسلیک شو

د تفاهم لیک مراسم د قرآنکریم د مبارکو آیاتو په تلاوت سره پیل شول.
په دې مراسمو کې د کابل پولي تخنیک پوهنتون مشرتابه او د کاردان خصوصي پوهنتون مشرتابه حضور درلود.
د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال د کاردان خصوصي پوهنتون مشرتابه او ورسره پلاوي ته د ښه راغلاست وینا تر څنګ د دې ډول همکاریو پر اهمیت خبرې وکړې او دا یې د علمي پرمختګ راز وبلل، ښاغلي اقبال د کابل پولي تخنیک پوهنتون او کاردان خصوصي پوهنتون ترمنځ د تفاهم لیک لاسلیک مهم او ارزښتناک وباله او زیاته یې کړه چې خپلې ټولي ژمنې به عملي کوي.
د يادونې وړ ده، چې ياد شوى تفاهم ليک د کابل پولي تخنيک پوهنتون او کاردان خصوصي پوهنتون ترمنځ د علمي او اکاډميکو همکاريو او د تدريسي څانګو په برخه کې لاسليک شو.
مراسم د یاد تفاهم لیک په لاسلیک او د دعایې په ویلو سره پای ته ورسیدل.