په کابل پولي تخنیک پوهنتون کې د تقویتي کورسونو فارغینو ته د سندونو د ویش مراسم ترسره شول
مراسم د قرآنکریم د مبارکو آیاتو په تلاوت سره پیل شول.
د کابل پولي تخنیک پوهنتون د محصلانو چارو مرستیال ښاغلی انجنیر ویس الدین بریالي د تقویتي کورسونو فارغینو ته د مبارکۍ ویلو تر څنګ، د يادو کورسونو پر اهميت خبرې وکړې او محصلینو ته يې لارښوونه وکړه، چې په خپلو درسونو کې جدي هڅې وکړي او له خپل وخت څخه ډېره ګټه د ځان، کورنۍ او امت مسلمه په ګټه ولګوي، تر څو په ټولو چارو کې بریالي وي.
ښاغلي بريالي د خپلو خبرو په دوام کې د محصلانو د خدمتونو او انسجام آمریت له مسوولينو او استادانو څخه مننه وکړه چې د محصلينو لپاره يې دا ډول پروګرامونه جوړ کړي دي.
په دې غونډه کې د محصلینو د خدمتونو د انسجام آمر ښاغلي سید عین الله هاشمي او دوو تنو محصلانو هم د موضوع په اړه خبرې وکړې.
غونډه فارغ شویو محصلینو ته د سندونو ویشلو او د دعایې په ویلو سره پای ته ورسیده.
