کابل پولي تخنیک پوهنتون د ازموینو ملي ادارې په توسط د کابل پولي تخنیک او ښوونې او روزنې پوهنتونونو د ماستري برنامو له کاندیدانو څخه ازموینه واخیسته. 13/11/1444
غونډه د قرآنکریم د مبارکو آیاتونو په تلاوت سره پیل شو.
د ازموینې پرانیستې مراسمو کې، د ازموینو ملي ادارې مشر الحاج شیخ عبدالباقي حقاني، د لوړو زده کړو وزارت د دفتر رئیس انجنیر روح الله روحاني، د کابل پولي تخنیک پوهنتون رهبري غړو او د ازموينو ملي ادارې مسؤلینو ګډون کړی وو.
لومړی د کابل پولي تخنیک پوهنتون رئیس پوهنوال دیپلوم انجنیر عبدالرشید اقبال د ښه راغلاست وینا تر څنګ د ازموینې نوماندانو ته په امتحان کې د شفافیت ډاډ ورکړ او ټولو ته یې د لا کامیابي هیله وکړه.
ښاغلي اقبال په دې برخه کې د خپلو ټولو امکاناتو, د ځای ترتیب، د استادانو په اماده ګي، امنیتي او نورو ټولو برخو کې د بشپړ اماده ګي ډاډ ورکړ.
ورپسې د ازموینو ملي ادارې رئیس شيخ عبدالباقي حقاني په خپلو خبرو کې ګډونوالو ته د ازموينې په پروسه کې د شفافيت او رامنځته شویو سهولتونو په اړه معلومات ورکړل او په یاده ازموينه کې یې د زیات شمیر کاندیدانو له ګډون څخه خوښي وښوده.
نوموړي وویل: اوس په افغانستان کې د هر اړخیزې ودې لپاره زمینه برابره ده او د اسلامي امارت مشرانو هڅه دا ده، چې د ټولنې علمي ضرورتونه پوره او په دیني او عصري برخو کې د زده کړو معیاري چوکاټ برابر کړي.
د مراسمو په پای کې د ازموینې د پوښتنو صندق د لوړو زده کړو وزارت څخه راغلي پلاوي، ازموینو ملي ادارې مشر شیخ عبدالباقي حقاني او د کابل پولي تخنیک پوهنتون رهبري غړو له خوا د ګډونوالو په حضور کې پرانیستل شو.
د یادونې وړ ده چې په دې ازموینه کې د کابل پولي تخنیک پوهنتون د نهو بیلابیلو ماستري برنامو لپاره محصلین جذب کوي.
