د کابل پولی‌تخنیک پوهنتون عمومی رئیس پیغام 

 

 

 

 

8 میاشتې 2 اونی ago

الحمد لله نحمده ونستعینه ونستغفره، ونعوذ بالله من شرور أنفسنا ومن سيئات أعمالنا، من يهده الله فلا مضل له ومن يضلل فلا هادي له. وأشهد أن لا إله إلا الله وحده لا شريك له، وأشهد أن محمداً عبده ورسوله.

کابل پولي تخنیک پوهنتون د افغانستان له هغو بنسټیزو او مخکښو علمي نهادونو څخه شمېرل کېږي، چې د انجینري، تخنیک،  څېړنو او تخصصي زده‌کړو په ډګر کې یې د زرګونو مسلکي کادرونو په روزنه سره، د هېواد د بنسټیزو برخو د پرمختګ لپاره نه ستړې کېدونکې هلې‌ ځلې کړي دي.

دا علمي بنسټ، چې د شاوخوا شپېتو کلونو تاریخ لري، د بېلابېلو تخنیکي پوهنځیو، مجهزو لابراتوارونو، تخصصي مرکزونو او د تجربه لرونکو استادانو پر مټ، د زده‌کړې، څېړنې او نوښت یو پیاوړی مرکز ګرځېدلی دی. د پوهنتون لید دا دی چې له نړیوالو علمي معیارونو سره برابر، متعهد، نوښتګر او د حل‌ لارو وړاندیزوونکي نسلونه وروزي؛ داسې نسلونه چې وکولای شي د هېواد په تخنیکي، ساختماني، معدني، انرژۍ او ټکنالوژۍ برخو کې د ځان بسیاینې او پراختیا موخې پوره کړي.

زموږ باور دا دی چې کیفیت‌ محوره زده‌کړه، نوښت ته لاره پرانیستل، علمي څېړنې، د صنعت او پوهې نښلول او د محصلینو عملي تجربه‌ییز مهارتونه هغه بنسټونه دي چې د یو قوي علمي نظام اساس جوړوي.

په همدې موخه، پوهنتون هڅه کوي چې د تدریس پروسه د نړیوالو معیارونو مطابق عیار کړي، نصابونه تازه او اړتیاوو سره سم انکشاف ورکړي، د استادانو ظرفیتونه لوړ کړي او له داخلي او بهرنیو تحصیلي نهادونو سره همکاري پراخه کړي.

د کابل پولي تخنیک پوهنتون رهبري ژمنه لري چې د دې علمي کلا د لا ودې، شفافې ادارې، حساب‌ ورکونې، متوازنې پراختیا او د محصلینو، استادانو او کارکوونکو د ظرفیت لوړونې لپاره ټول اداري او تخنیکي امکانات په کار واچوي.

زه د دې ستر مسؤولیت د ترسره کولو پر مهال، ځان د پوهې د خپراوي، علمي اخلاقو، خدمت او اصلاح پیغام‌ ورکوونکی بولم. هیله لرم چې د پوهنتون محصلین، استادان، علمي کادرونه او نور همکاران، د یو بل تر څنګ، د یوې هوسا، باعزته او خود کفاء افغانستان د جوړېدو لپاره خپلې هڅې همغږې کړو.

د کابل پولي تخنیک پوهنتون دروازې د ټولو هغو ځوانانو، استادانو، څېړونکو او ادارو پر مخ خلاصې دي، چې غواړي د علم، تخنیک، نوښت او ملي پرمختګ په لاره کې فعاله ونډه واخلي.