د پوهنیار ډیپلوم انجنیر محمد حامد عمر علمي ـ څیړنیزه مقاله " د پنجشیر حوزې د اقلیمي بدلون د اغېزو ارزونې " تر عنوان لاندې د قزاقستان هیواد کې د قزاق جرمن پوهنتون له خوا خپرېدونکې معتبر نړیوال ژورنال «Central Asian Journal of Water Research» له خوا خپره
یاده څېړنیزه مقاله د کابل پولي تخنیک پوهنتون د اوبو او چاپېریال انجنیري پوهنځي رئیس پوهنیار محمد حامد عمر له خوا ترسره شوې چې د پنجشیر د سیندیزې حوزې د اوبو پر جریان د اقلیمي بدلون د پام وړ اغېزو ارزونه او د کابل سیند په هایدرولوژیکي نظام کې مهم رول لري.
د SWAT ماډل او د SSP2-4.5 او SSP5-8.5 اقلیمي سناریوګانو پر بنسټ، څېړنه ښيي چې د روانې پېړۍ تر پایه، د سیند جریان به له ۱۱.۹۵٪ څخه تر ۲۸.۷۵٪ پورې کم شي. همداراز، د اوج جریان وخت به له جون څخه اپرېل ته انتقال ومومي، چې دا بدلون به د اوبو د فصلي موجودیت توازن ګډوډ کړي او د کرنې لپاره د وچکالۍ خطر زیات کړي.
دا څېړنه د اقلیمي بدلون پر وړاندې د چمتووالي، انعطاف منونکي مدیریت او تطبیقي تدابیرو پر اړتیاوو ټینګار کوي او خبرداری ورکوي چې ورته اغېزې به د افغانستان په نورو غرنیو سیمو کې هم رامنځته شي.
کابل پولي تخنیک پوهنتون دا مقاله یوه مهمه علمي لاسته راوړنه بولي او د پوهنتون د څیړنیزو ظرفیتونو څرګندوی او ښاغلي عمر ته د لا زیاتو علمي او څیړنیزو بریاوو هیله څرګندوي.
