د کابل پولي تخنیک پوهنتون نویو ګمارل شویو کارمندانو ته د اداري اسنادو مدیریت او دفترداري په برخه کې پنځه ورځنی ورکشاپ پیل شو.
د ورکشاپ د پرانستې مراسم د قرآن کریم د مبارکو آیتونو په تلاوت سره پیل شول.
لومړی د کابل پولي تخنیک پوهنتون د کارکوونکو چارو آمر محترم مولوي رشید احمد حقاني ټولو ګډونوالو ته ښه راغلاست ووایه او د دغه ورکشاپ جوړېدل یې د کاري بهیر د ښه والي او اداري وړتیاوو د لوړولو لپاره مهم ګام وباله.
نوموړي له نویو ګمارل شویو کارکوونکو وغوښتل چې په دې ورکشاپ کې فعاله ونډه واخلي او خپلې زده کړې د کاري بهیر د ښه والي لپاره وکاروي.
وروسته د لوړو زده کړو وزارت د کارکوونکو چارو ریاست د ظرفیت لوړولو او اداري پراختیا آمریت استادانو د "اداري اسنادو مدیریت او دفترداري" موضوع باندې کارکوونکو ته علمي او عملي درسونه ورکړل.
دا درسونه د مدیریتي او مسلکي مهارتونو د لوړولو په موخه د دفتردارۍ او اداري اسنادو د مدیریت په بېلابېلو برخو کې وړاندې شول.
د یادونې وړ ده چې دا ورکشاپ به د ۵ ورځو لپاره دوام کوي او نویو ګمارل شویو کارکوونکو ته به پکې هر اړخیزه روزنه ورکول کیږي.
