د کابل پولي تخنیک پوهنتون د مالي او اداري معاونیت، د پوهنځیو رئیسانو او د څانګو له آمرینو تر منځ مشورتي غونډه ترسره شوه
غونډه د قرانکریم د مبارکو ایاتونو په تلاوت سره پیل شوه.
لومړی د کابل پولي تخنیک پوهنتون مالي او اداري مرستیال ښاغلي مولوي محمد یاسین حقاني د پوهنځيو رئیسانو او د څانګو آمرینو حضور ته د ښه راغلاست تر څنګ د دغه پوهنتون د تدریسي او اداري څانګو د اړینو اړتیاوو د پوره کولو په موخه د پوهنځیو او څانګو ترمنځ په مالي او تدارکاتي چارو کې د همغږۍ او مشورو په هکله په تفصیل سره خبرې وکړې.
نوموړي دا ډول غونډې د کارونو د پرمختګ، روڼتیا او شفافیت راز وبلی او د پوهنځیو له رئیسانو او د څانګو له آمرینو څخه یې د هر راز همکارۍ غوښتنه وکړه.
ښاغلي حقاني د دغه پوهنتون د پاتې پروژو په بشپړولو کې د پوهنځیو له رئیسانو څخه د بشپړې همکارۍ غوښتنه وکړه، ترڅو تدارکاتي پروسې په شفاف او هر اړخیزه توګه پر مخ ولاړې شي.
همدارنګه د مالي، حسابي او تدارکاتي چارو د څرنګوالي په اړه د کابل پولي تخنیک پوهنتون مالي او حسابي آمر ښاغلي مولوي فضل الله خادم وینا وکړه، نوموړي د یاد معاونیت د لاسته راوړنو لکه: د اداري کارونو د ښه تطبیق، د کاري چارو د ښه والي په موخه د څو فرعي کمېټو جوړولو، د زیربناوو د ترمیم او بیا جوړولو، د پوهنتون احاطوي دیوال او عمومي دروازې رغولو او د لابراتوار تجهیزاتو د چمتو کولو او د پوهنتون په سطحه د نورو بیلابیلو پروژو په اړه هر اړخیز معلومات وړاندې کړل.
د غونډې په دوام کې د پوهنځیو رئیسانو او د څانګو آمرینو په خپل وار سره خپل وړاندیزونه او نظریات وړاندې کړل، چې د یادو ستونزو د تعقیب او حل په اړه ښاغلي حقاني اړوند مسؤلینو ته لازمې لارښوونې وکړې او ژمنه یې وکړه چې د توان مطابق به د هري برخې ستونزو ته په وخت رسیدګي کوي.
