په کابل پولي تخنیک پوهنتون کې د مرکز خصوصي پوهنتونونو د استادانو لپاره دیني_علمي درې ورځنی سمینار پیل شو.
د یاد سمینار پرانیست غونډه د قرآن کریم د څو مبارکو ایتونو په تلاوت سره پیل شوه.
د دغه سمینار پرانیست غونډه چې د کابل پولي تخنیک پوهنتون په عمومي جمنازیوم کې جوړه شوې وه، پکې د لوړو زده کړو سرپرست وزیر ښاغلي شیخ الحدیت مولوي ندامحمد ندیم، د مخابراتو او معلوماتي ټکنالوژي سرپرست وزیر ښاغلي نجیب الله حقاني، د لوړو زده کړو وزارت علمي معین ښاغلي دوکتور لطف الله خیرخواه، د خصوصي پوهنتونونو د اتحادیې رئیس ښاغلي طارق کمال، د لوړو زده وزارت د رهبري مقام غړو، د کابل پولي تخنیک پوهنتون مشرتابه هئیت، د خصوصي پوهنتونونو رئیسانو او استادانو ګډون درلود.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال د غونډې ګډونوالو ته د پیل او ښه راغلاست وینا وکړه او نوموړي زیاته کړه چې، دا ډول پروګرامونه او سمینارونه د خصوصي او دولتي پوهنتونونو تر منځ فاصله را لنډوي او د وزارت مقام له رهبري څخه یې هیله وکړه تر څو دا ډول سمینارونه نور هم جوړ کړل شي.
ورپسې د لوړو زده کړو سرپرست وزیر ښاغلي شیخ الحدیث مولوي ندا محمد ندیم په دغه سمینار کې د خصوصي پوهنتونونو د استادانو څخه مننه او قدردانی وکړ.
ښاغلي ندیم د علم حاصلولو په اهمیت، د یو مسلمان په ځانګړتیاو او د استادانو تر منځ د نظرونو په تبادله بشپړخبرې وکړې.
نوموړي له استادانو څخه وغوښتل تر څو د مسلمانانو بچي په اسلامي او اخلاقي روحیه و روزي، ترڅو د دوی په وسیله د یو خپلواک، آزاد او پرمختللي افغانستان څښتنان و اوسو.
همدا راز د مخابراتو او معلوماتي ټکنالوژي وزارت سرپرست وزیر مولوي نجیب الله حقاني په خپلو خبرو کې د پوهنتونونو د استادانو او د دینې عالمانو تر منځ په هر اړخیزو اړیکو رامنځ ته کولو ټینګار وکړ.
ښاغلي حقاني د انسان د پیدایښت په اهمیت، د علم په فرضیت او د ځوانانو، علمي او مسلکي اشخاصو په مسئولیتونو بشپړ خبرې وکړې
همدارنګه د لوړو زده کړو وزارت علمي معین محترم دوکتور لطف الله خیرخواه د خپلو خبرو په ترڅ کې د استادانو تر منځ د نظرونه تبادله، د مسلکي تجربو شریکول او د خصوصي پوهنتونونو ستونزو ته رسیدنه د دې سمینار له مهمو اهدافو څخه یاد کړل.
د غونډې په اخیر کې د خصوصي پوهنتونونو د اتحادیې رئیس ښاغلي ډاکټر طارق کمال د یاد سمینار د جوړیدو له امله له اړوندو مسوولینو څخه مننه وکړه او د خصوصي پوهنتونو او موسساتو د پیاوړتیا په برخه کې یې د لوړو زده کړو له همکاري څخه مننه او قدرداني وکړه.
همدا راز یې ژمنه وکړه چې د هېواد د بچیانو د سالمې روزنې په برخه کې به له خپل ټول توان څخه کار اخلي.
