ښاغلی پوهندوی محمد داود احمدزي د الکترومیخانیک پوهنځي د سرپرست رئیس په توګه معرفي شو.
غونډه د قرانکریم د مبارکو آیتونو په تلاوت سره پیل شوه.
دغه غونډه په همدې موخه د الکترو میخانیک پوهنځي په ریاست کې ترسره شوه.
په یاده غونډه کې د کابل پولي تخنیک پوهنتون عمومي رئیس ښاغلي پوهنوال دیپلوم انجنیرعبدالرشید اقبال، د کابل پولي تخنیک پوهنتون مالي او اداري سرپرست مرستیال ښاغلي انجنیر سید مصباح الدین هاشمي، د پوهنځیو رئیسانو، استادانو او کارمندانو ګډون درلود.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیرعبدالرشید اقبال ټولو حاضرینو ته د ښه راغلاست ترڅنګ د الکترومخانیک پوهنځي د پخواني رئیس ښاغلي پوهنمل محمد امین امین د علمي او اداري کړنو او فعالیتونو ستاینه وکړه او ښاعلي پوهندوی محمد داود احمدزي ته یې د پوهنځي د سرپرست رئیس په توګه د ټاکل کېدو مبارکي ورکړه.
ورپسې د الکترومیخانیک پوهنځي پخواني رئیس ښاغلي پوهنمل محمد امین امین د پوهنتون له رهبري هئیت، استادانو او کارمندانو څخه د خپلې دندې په موده کې د همکارۍ له امله مننه وکړه او ښاغلي پوهندوی محمد داود احمدزي ته یې د مبارکي ترڅنګ د همکارۍ ژمنه وکړه.
همدارنګه د پوهنتون مالي او اداري سرپرست مرستیال ښاغلي انجنیرسید مصباح الدین هاشمي هم د پوهنمل محمد امین امین علمي او اداري فعالیتونونه په خوښي سره یاد کړل او استاد محمد داود احمدزي ته یې په یاد بست کې د ټاکل کېدو مبارکي ورکړه.
په پای کې د یاد پوهنځي لپاره نوي سرپرست رئیس َښاغلي محمد داود احمدزي د پوهنتون له رهبري څخه مننه وکړه چې، پر ده باندي اعتبار کړي او د نوموړي بست لپاره یې وړ بللی.
نوموړي زیاته کړه چې، ورسپارل شوې دنده به په پوره صداقت سره پرمخ وړي.
