په کابل پولي تخنیک پوهنتون کې د انجنیر زیارمل خطاب د تګ او له کارمندانو سره د خدای پامانې لپاره ستاینغونډه ترسره شوه.
غونډه د قرآنکریم د مبارکو آیتونو په تلاوت سره پیل شوه.
دغه غونډه چې د کابل پولي تخنیک پوهنتون لپاره د لوړو زده کړو وزارت ځانګړي استازي د مالي او اداري چارو مرستیال ښاغلي انجنیر زیارمل خطاب په ویاړ د تکنالوژی معلوماتی په تالارکې جوړه شوې وه، ټولو کارمندانو او کارکونکو په کې ګډون کړی و.
لومړی د کابل پولي تخنیک پوهنتون لپاره د لوړو زده کړو وزارت ځانګړي استازي د مالي او اداري چارو مرستیال ښاغلي انجنیر زیارمل خطاب ټولو ګډونوالو ته د مننې او قدرداني ترڅنګ د قرانکریم په مبارکو آیتونو او نبوي احادیثو په رڼا د افغانستان د اسلامي امارت له تګلارې سره سم د قانون د حاکمیت، صداقت، اعتدال او انصاف په برخه کې د خپلو هڅو او مسئولیتونو په اړه خبرې وکړې، همدا راز نوموړي د خپلې کاري دورې په اوږدو کې د دغه پوهنتون د کارمندانو او کارکونکو د دندو او فعالیتونو په اړه خوښی څرګنده کړه.
ښاغلي خطاب زیاته کړه چې د کابل پولي تخنیک پوهنتون ټولې لاسته راوړنې، نوښتونه او دریځ په داخلي او خارجي کچه د دغه پوهنتون د رهبري هیئت او د کارمندانو هڅو او دندو پورې تړلي دي او ټولو ته يې د بریالیتوب هیله وکړه.
ورپسې د کابل پولي تخنیک پوهنتون د کارمندانو په استازیتوب د دغه پوهنتون د لیلیې آمر ښاغلي نجیب الله امرخیل د ښاغلي انجنیرزیارمل خطاب د چارو د ښه پرمخ بیولو او د دغه پوهنتون د پرمختګ په برخه کې نه ستړې کیدونکې هلي ځلي، د نوموړي د شخصیت ځانګړتیاؤ، ښېګڼو، احساساتو، عواطفو، سالمې رهبرۍ او مدیریت په اړه خبري وکړې .او نوموړي ته یې د ژوند په چارو کې د لا بریالیتوب دعا وکړه.
همدا راز یو شمیر کارمندانو د اړوندو څانګو په استازیتوب د ښاغلي انجنیرزیارمل خطاب د ځانګړتیاؤ په اړه لکه عدالت، استقامت، مسولیت پذیري او مهربانې خبري وکړي او د ژوند په ټولو چارو کې یې ورته د بریالیتوب هیله وکړه.
غونډه د کابل پولي تخنیک پوهنتون د بشري سرچینو آمر قاضي محمد انس مجاهد په دعا سره پای ته ورسیده.
