د کابل پولي تخنیک پوهنتون د کرکټ تر سره شوي ټورنمینټ اتلې لوبدلې ته د جایزو ورکولو مراسم ترسره شول
17/2/1445-----12/6/1402
یاد مراسم د قرآنکریم د مبارکو آیاتونو په تلاوت سره پیل شول.
په دې مراسمو کې د کابل پولي تخنیک پوهنتون رهبري هئیت ، استادانو، آمرینو، ورزشکارانو او میلمنو ګدون درلود.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال ورزشکارانو ته د دوی د بریا مبارکي وویله او د ورزشکارانو د بدني او روحي روغتیا په برخه کې یې د ورزش په اهمیت بشپړ خبرې و کړې.
ورپسې د کابل پولي تخنیک پوهنتون د دعوت ارشاد مبلغ ښاغلي مولوي حاجي محمد د اسلام د سپیڅلي دین د لارښوونو له نظره د ورزش په څرنګوالي خبرې وکړې او ورزشکاران یې وهڅول چې د ورزش په وخت کې خپلو دیني مسولیتونو ته هم متوجه شي.
همدا راز د کابل پولي تخنیک پوهنتون د محصلانو چارو مرستیال انجنیر ویس الدین بریالي په خپلو خبرو کی زیاته کړه : موږ هڅه کوو تر څو محصلینو ته د زده کړو تر څنګ د ورزش په برخه کې هم لازم سهولتونه رامنځ ته کړو او هڅه مو دا ده چې له دې لارې زده کړیالان خپلو مسولیتونو ته متوجه کړو.
د یادونې وړده چې مراسم د کمپیوتر ساینس پوهنځي لوبډلې ته د لومړي مقام، د اوبو او چاپیریال ساتنې پوهنځی لوبدلې ته د دویم او د کیمیاوي صنایعو پوهنځي لوبډلې ته د دریم مقام کپونو او جایزو په ورکولو سره پاي ته ورسیدل.
