د کابل پولي تخنیک پوهنتون او غرني شرکتونو ګروپ ترمنځ د ګډو همکاریو هوکړه لیک لاسلیک شو.
په دې مراسمو کې د کابل پولي تخنیک پوهنتون رهبری هیئت او د غرني شرکتونو ګروپ رهبري هیئت ګډون درلود.
لومړی ښاغلي انجنیر سردار ولي صالحی د کابل پولي تخنیک پوهنتون د عمومي ریاست سرپرست رئیس تولو ته د ښه راغلاست و ینا ترڅنګ د پوهنتون د پرمختګونو او لاسته راوړنو، لابراتوارونو، څیړنو او بیلابیلو موضوعاتو په اړه هر اړخیزې خبرې وکړې.
نوموړي په خپلو خبرو کې د خصوصي سکتورونو سره د لا زیاتې همکارۍ د اهمیت یادونه وکړه او وویل چې کابل پولي تخنیک پوهنتون د انجینرۍ په برخه کې یو مخکښ نهاد دی چې د څیړنو په برخه کې د پام وړ پرمختګونه لري، هغه د غرني ګروپ شرکت څخه وغوښتل چې د پوهنتون د لابراتورونو څخه په څیړنیزو چارو کې ګټه واخلي او همداراز د تکړه او مسلکي محصلینو په جذبولو سره د هیواد د خدمت لپاره زمینه برابره کړي.
ښاغلي صالحی ټینګار وکړ چې د دې تفاهم نامې موخه د کابل پولي تخنیک پوهنتون او غرني شرکتونو ګروپ کمپنیو ترمنځ یو ګډ او پایداره همکاري رامنځته کول دي او زیاته یې کړه چې دغه تفاهم لیک باید په عملي کې پلي شي او یوازې د یو کاغذي سند د لاسلیک کولو پورې محدود نه شي.
ښاغلي صالحي وعده وکړه چې کابل پولي تخنیک پوهنتون چمتو دی خپل ټول ظرفیتونه او امکانات د دې تفاهم نامې د پرمختګ لپاره وکاروي او د صنعت د پراختیا او د هیواد د پرمختګ لپاره مرسته وکړي.
همدا راز ښاغلي احمد یار غرني د غرني شرکتونو ګروپ عمومي رئیس د دې سکتور د عمده فعالیتونو په اړه مفصل خبرې وکړې او ټینګار یې وکړ چې غرني شرکتونو ګروپ د انجینرۍ او ساختماني په مختلفو برخو کې د پام وړ فعالیتونه لري.
هغه د کابل پولي تخنیک پوهنتون سره د دې تفاهم لیک لاسلیکول یو ستره لاسته راوړنه وبلله او زیاته یې کړه چې د دې تفاهم نامې لاسلیک نه یوازې د غرني شرکتونو ګروپ لپاره، بلکې د هیواد د صنعت لپاره هم یوه بې ساري موقع ده چې د کابل پولي تخنیک پوهنتون له علمي او تخصصي ظرفیتونو څخه په مختلفو برخو کې ګټه واخلي.
غونده د تفاهم لیک لاسلیک او دعايې په ویلو سره پاي ته ورسیده.
