د کابل پوليتخنيک پوهنتون کې د مطالعې د ارزښت او اغېزو په اړه سيمينار ترسره شو
یاد سیمینار چې هدف یې د محصلینو فکري ځواک پیاوړي کول، په څېړنه کې د مطالعې رول، د معلومات زیاتونه او په علمي بهیر کې د مطالعې ژور اغېز پېژندنه وه، د پوهنتون د رهبرۍ پلاوي، کارمندانو او استادانو په شتون کې د دوکتور لطف الله خیرخیواه صاحب له خوا محصلانو ته وړاندې شو.
د کابل پوليتخنيک پوهنتون د محصلانو چارو مرستيال انجنير مفتاح الدين عزام د سيمينار د محتوا، هدف او د سیمینار د جوړېدو په برخه کې د ترسره شویو اقداماتو په اړه معلومات وړاندې کړل او له محصلانو يې وغوښتل، چې د خپلو تخصصي زده کړو ترڅنګ آزادې مطالعې او د پوهنتون د کتابتون له علمي سرچينو څخه هم ګټه واخلي.
د لوړو زده کړو وزارت د علمي چارو پخواني معين دوکتور خيرالله خيرخواه د مطالعې ارزښت ته په کتو د نړۍ د سياسي نقشې د اسلامي دولتونو، اسلامي تمدنونو او د نړۍ د نورو تمدنونو په اړه هر اړخيز معلومات وړاندې کړل.
نوموړي د خپلو خبرو په بله برخه کې د مطالعې پر ارزښت او اغېزو ټينګار وکړ او ويې ويل: "مطالعه يوازې د معلوماتو راټولول نه دي، بلکې د نړۍ د ښه پېژندلو، د ټولنيزو او اقتصادي اړيکو د درک، د تحليلي فکر د پياوړتيا او د باخبره پرېکړو کولو وسيله ده". ښاغلي خیرخواه له محصلانو وغوښتل، چې مطالعه په دوامداره، دقيقه او خپلواکې څېړنې سره ترسره کړي، ترڅو وکولای شي د ژوند په بېلابېلو برخو کې له خپلې پوهې څخه اغېزمنه ګټه واخلي.
نوموړي سپارښتنه وکړه، چې محصلان دې د نوښت او شخصي ابتکار لاره خپله کړي او خپله علمي پوهه دې له عملي تجربو سره يوځای کړي. د نوموړي په وينا، ژوره او دوامداره مطالعه د بريا او په فردي او ټولنيز ژوند کې د مثبت بدلون کلي ده او هر ځوان کولای شي د علم او پوهې په سمې استفادې سره د هېواد په علمي او فرهنګي پرمختګ کې اغېزناک رول ولوبوي.
دوکتور خيرخواه د خپلو خبرو په پای کې محصلانو ته وويل، که غواړي رښتينې بريا ترلاسه کړي او روښانه راتلونکې ولري، نو مطالعه، د پوهې ترلاسه کول او نوښت دې هېڅکله نه هېروي. نېټه: پنجشنبه
۱۴۴۷ هـ.ق د ذوالحجې ۴مه
۱۴۰۵ هـ.ش د ثور ۳۱ مه
