د کابل پولي تخنیک پوهنتون د انجنیري صنایع کیمیاوي پوهنځي ۱۲ تنه محصلین د عملي کارونو د ترسره کولو لپاره ساحوي سیمو ته واستول شول.
د کابل پولي تخنیک پوهنتون د انجنیري صنایع کیمیاوي (نفت او ګاز) پوهنځي ۱۲ تنه محصلین، چې د استادانو عزت الله حمیدي، دوکتور شفاعت احمد صلاح الدین او انجنیر فردین حبیبي تر رهبري لاندې دي، د عملي تولیدي کارونو د ترسره کولو په موخه د هیواد په شمالي ولایتونو کې مختلفو ساحوي سیمو ته واستول شول.
په دې تعلیمي او علمي پروګرام کې محصلین به د بندر حیرتان مهمو تاسیساتو او فابریکو څخه لیدنه وکړي، چې پکې رفاینري توفایل، شرکت کام انټرنیشنل، حیرتان ترمینل سرویس او د اماراتو د نفت او ګاز شرکت په ګډون دي.
سربیره پردې، د پروګرام په چوکاټ کې به له شبرغان او سرپل ولایتونو (جرقدوق، یتیم تاق، خواجه ګوگردک، انگوت او قشقري) څخه د کانونو او تصفیه خانو څخه هم لیدنه وشي، څو محصلین په عملي ډول د نفت او ګاز د موادو د استخراج، تصفیه او پروسس د کارونو سره بلد شي.
د یادونې وړ ده چې د دې محصلینو عملي پرکتیک د یاد پوهنځي د تعلیمي برنامې برخه ده چې د هغوی فني او مسلکي مهارتونه د بازار د اړتیاوو سره سم لوړوي.
کابل پولي تخنیک پوهنتون چې د انجنیري په برخو کې د یو معتبر تعلیمي بنسټ په توګه پېژندل شوی، په دوامداره توګه هڅه کوي چې له خپلو محصلینو سره د عملي زدهکړو زمینه برابره کړي او مسلکي، تکړه او ژمن انجنیران د هېواد او ټولنې خدمت ته وروپېژني.
