د کابل پولي تخنیک پوهنتون ۱۷۰ تنه محصلان د رواني صحت له زده کړیز کورس څخه فارغ شول.
د محصلانو د رواني پوهاوي او ذهني ظرفیت لوړولو په موخه، یو میاشتنی زده کړیز پروګرام د «رواني صحت» تر عنوان لاندې د کابل پولي تخنیک پوهنتون د محصلانو چارو معاونیت له لوري ترسره شو.
د مراسمو په پیل کې د علمي چارو مرستیال دوکتور ضیاءالرحمن مشک عالم زوی ګډونوالو ته د ښه راغلاست ترڅنګ له دغه ابتکاري پروګرام څخه د قدردانۍ څرګندونه وکړه. نوموړي د دې ډول غیرنصابي پروګرامونو اهمیت ته په اشارې سره وویل چې دا ډول فعالیتونه د اکادمیکو زده کړو ترڅنګ د محصل شخصیتي، علمي او رواني پیاوړتیا لپاره ډېر ارزښت لري. هغه وویل : محصلان وهڅول چې له موجودو تحصیلي فرصتونو څخه اعظمي ګټه واخلي او خپل وخت د علمي څېړنو لپاره وکاروي.
ورپسې د محصلانو چارو مرستیال حافظ انجنیر عنایت الله رحیمي هم هر اړخیزه وینا وکړه. نوموړي د صحت او روان پوهنې پر مفاهیمو رڼا واچوله او د هېواد د علمي او ټکنالوژیک پرمختګ لپاره یې د دې برخې ارزښت ډېر مهم وباله. نوموړي ټینګار وکړ چې تحصیل باید یوازې د رزق لپاره نه وي بلکې د ټولنې او اسلامي امت د خدمت په نیت ترسره شي.
همداراز، د محصلانو د خدمتونو او همغږي آمر سید عین الله هاشمي د رواني سلامتیا پر ارزښت خبرې وکړې او محصلان یې مثبت فکر، منظم تحصیل او د ټولنې او کورنۍ د هيلو د پوره کولو لپاره هڅو ته وهڅول.
مراسم د محصلانو د سرتیفیکېټونو په وېش او دعایې په ویلوسره پای ته ورسېدل.
