د کابل پولي تخنیک پوهنتون په ورزشي جمنازیوم کې د پنځه ګونو ورزشي سیالیو لړۍ پیل شوه.
په دې سیالیو کې له ۶۰ څخه زیاتو محصلینو ګډون کړی، چې پکې ځغاست لوبي، نښه ویشتنه او وزن انتقال شامل دي.
د سیالیو په پیل کې د کابل پولي تخنیک پوهنتون د ورزشي چارو آمر ښاغلي احمد فایق ضیایي، د دغو سیالیو د ارزښت په اړه خبرې وکړې.
نوموړي وویل، دا ډول پروګرامونه د هېواد د عنعنوي او ملي ورزشونو د ودې لپاره مهم رول لري.
همداراز، موخه یې د محصلینو ترمنځ د عنعنوي ورزشونو ترویج او د پنځهګونو ورزشي ټیم لپاره د غوره ورزشکارانو ټاکنه ده.
سیالۍ په مختلفو کتګوریو کې ترسره شوې او محصلینو پکې په خوښۍ او لیوالتیا ګډون وکړ.
یادې سیالۍ د پوهنتون د ورزشي چارو آمریت په همکارۍ او د رهبري هیئت په ملاتړ په بریالیتوب سره پیل شوې.
