په کابل پولي تخنیک پوهنتون کې د تضمین کیفیت او اعتبار ورکولو لپاره د علمي پروګرامونو او چوکاټ جوړوني روزنیز سیمینار جوړ شو
سیمینار د قرآنکریم د مبارکو آیاتونو په تلاوت سره پیل شو.
یاد سیمینار د لوړو زده کړو وزارت د کیفیت د تضمین او اعتبار ورکولو ریاست لخوا په لاره اچول شوی، چې په کې د کابل پولي تخنیک پوهنتون رهبري، د لوړو زده کړو وزارت د کیفیت د تضمین او اعتبار ورکولو ریاست رئیس، د ځینو خصوصي پوهنتونونو استازو، د پوهنځيو ریسانو، استادانو، د اداري برخي آمرینو او کارمندانو ګډون درلود.
لومړی د کابل پولي تخنیک پوهنتون سرپرست رئیس ښاغلي انجنیر سردار ولي صالحي د لوړو زده کړو وزارت څخه راغلي پلاوی، د سیمینار چمتوکوونکو او د سیمینار ګډونوالو ته د ښه راغلاست وینا تر څنګ د پوهنتون د علمي او هر اړخیزو اهدافو د تر لاسه کولو لپاره د کیفیت د تضمین د یوولس معیارونو د تطبیق او د اسنادو د چمتو کولو په برخه کې یاد سیمینار مهم وبلی او د سیمینار له ګډونوالو یې وغوښتل چې تر پایه په دې سیمینار کې ګډون وکړي، تر څو په راتلونکي کې د دې پوهنتون د کیفیت لوړونې په برخه کې ورڅخه کار واخلي.
ښاغلي صالحي د دغه سیمینار د ښه پرمخ بیولو لپاره د کابل پولي تخنیک پوهنتون د مشرتابه او کارکوونکو د پوره همکارۍ ډاډ څرګند کړ.
ورپسې د لوړو زده کړو وزارت د کیفیت د تضمین ورکولو رئیس ښاغلي استاد شاکر وحیدي په خپلو خبرو کې د پوهنتون له رهبرۍ او د سیمینار له ګډونوالو څخه مننه او قدر دانی وکړ او د یاد سیمینار د ضرورت او اهمیت په اړه یې هر اړخیزي خبرې وکړي.
نوموړي په پوهنتونونو کې د کیفیت د تضمین یوولس ګوني معیارونه حتمی او ضروری یاد کړل، او زیاته يې کړه چې د یاد سیمینار پایلې به د پوهنتون د شته ستونزو په جل کې ګتورې تمامې شي.
د یادونی وړ ده، چې دغه سیمینار به څلور ورځې دوام وکړي چې درسې چارې به یې د پکتیا پوهنتون استاد پوهنمل امین احمدزی، د شیخ زاید پوهنتون استاد پوهنمل قدرت الله ځواک او د خاتم النبیین پوهنتون استاد ښاغلي تسنیم کاویان پر مخ وړي.
