کابل پولي تخنيک پوهنتون کې د انساني قاچاق د مخنیوي په اړه د عالیقدر اميرالمؤمنين (حفظه الله تعالی) فرمان د تشریح سيمينار وړاندې شو
۲۶ شوال المکرم ۱۴۴۷ هـ.ق
۱۴۰۵ هـ.ش کال د حمل له ۲۴
دغه علمي سيمينار چې د کابل پولي تخنيک پوهنتون د محصلانو چارو معاونین او د دعوت او ارشاد آمریت له خوا ترتیب شوی و، ګڼ شمېر مسؤلینو، استادانو او محصلينو په ګډون کړی و.
اسلامي ثقافت د ډيپارتمنت استاد پوهنیار عبدالله عثماني د يو علمي او تحليلي پریزینټیشن له لاري د انسان قاچاق پديده د اسلامي شريعت له نظره وڅېړله، نوموړي د انسان قاچاق شرعي حکم تحليل کړ او د فقهي اصولو او قواعدو په رڼا کې يې د دې پديدې ماهيت د اسلامي شريعت په چوکاټ کې وارزاوه.
همدارنګه ښاغلي عثماني د اسلامي نظام مسؤليتونه او مکلفيتونه د انساني قاچاق پر وړاندې روښانه کړل او د دې ناوړه پديدې د مخنيوي او مقابلې لپاره يې د اميرالمؤمنين (حفظه الله تعالی) د فرمان ډیر مهم او ارزښتمند یاد کړ او په دې برخه کې یې د یاد فرمان هر اړخیزه تشریح د سیمینار ګډونوالو ته وړاندې کړه.
د سيمينار په وروستۍ برخه کې د کابل پولي تخنيک پوهنتون د محصلانو چارو مرستيال انجنیر مفتاح الدين عزام د وخت د ارزښت او اهميت په اړه مفصله وينا وکړه او محصلين يې وهڅول چې د پرديو کلتورونو له تقليد څخه ډډه وکړي او خپل سيرت او صورت د نبوي سنتو او شرعي احکامو سره سم برابر کړي. نوموړي محصلين راوبلل چې د ا.ا.ا له لوري صادر شوي فرامين او ابلاغيې مراعات او پيروي وکړي او په ګډه توګه د ناوړو پدیدو د مخنیوي په برخه کې مبارزه وکړي.
