په کابل پولي تخنیک پوهنتون کې د اوبو نړیوال کنفرانس ته د اماده ګۍ په موخه د لوړو زده کړو وزارت او د مرکزي پوهنتونونو د نشراتو له مسؤلینو سره غونډه ترسره شوه.
په پیل کې د لوړو زده کړو وزارت د اطلاعاتو، عامه پوهاوي او نشراتو رئیس حافظ انجنیر روح الله روحاني د نشراتو پر اهمیت، د اطلاع رسونې پر اغېز او د علمي کنفرانسونو پر ارزښت خبرې وکړې. نوموړي د نشراتي کمېټې مسؤلینو ته لازمې سپارښتنې وکړې او ټینګار یې وکړ چې د کنفرانس رسنیز پوښښ باید هر اړخیز، دقیق او اغېزناک وي.
ورپسې د کابل پولی تخنیک پوهنتون د اړیکو او عامه پوهاوي امر ارسلا حسان د کنفرانس د نشراتي برخې د ترسره شویو فعالیتونو راپور وړاندې کړ.
نوموړي د نشراتو کمیټې د عمده فعالیتونو لکه د نشراتي موادو اماده کول، د کابل ښار په بیلابیلو برخو کې د بیلبوردونو نصبول، د بروشورونو توزیع او په بنرونو کې د اوبو نړیوال کنفرانس اړوند چاپېدونکو شعارونو یادونه وکړه.
ښاغلي حسان یاد کنفرانس نه یوازې د کابل پولي تخنیک پوهنتون بلکې د لوړو زده کړو وزارت او ټول افغانستان یوه لویه لاسته راوړنه وبلله او د لوړو زده کړو وزارت او مرکزي پوهنتونونو څخه یې د لا زیاتې همکارئ غوښتنه وکړه.
په غونډه کې د بېلابېلو موضوعاتو په اړه بحث وشو، چې مهم ټکي یې د مرکزي پوهنتونونو له لوري د نشراتي همکارۍ پیاوړتیا، د ټولنیزو شبکو د سپانسر یا تمویل اړتیا، په ملي او نړیوالو رسنیو کې د کنفرانس پراخ انعکاس، له رسنیو سره پر وخت همغږي، د انټرنیټي امکاناتو اماده کول او د نشراتي کمېټې اړوند فرعي کمېټو ایجاد و.
په اخیر کې د مرکزي پوهنتونو د نشراتو امرینو او د غونډې برخوالو د نشراتي فعالیتونو د لا تقویې په اړه نظرونه وړاندې کړل او ډاډ یې څرګند کړ، چې په دې برخه کې به هر اړخیزه همکاري کوي.
غونډه د دعایې په ویلو پاي ته ورسید.
