د کابل پولي تخنیک پوهنتون محصلینو ته د روژې مبارکې میاشتې د فضیلت په اړه سیمینار جوړ شو
سیمینار د قرآنکریم د مبارکو آیاتونو په تلاوت سره پیل شو.
لومړی د کابل پولي تخنیک پوهنتون د دعوت او ارشاد آمر ښاغلي مولوي عبدالخلیل درویش، د لوړو زده کړو وزارت د دعوت او ارشاد رئیس ښاغلي شیخ شاکرالله وحدت، ورسره پلاوي او محصلینو ته د ښه راغلاست او پیلېزه وینا وکړه.
ورپسې د لوړو زده کړو وزارت د دعوت او ارشاد رئیس ښاغلي شیخ شاکرالله وحدت په یاد سیمینار کې د محصلینو له ګډون څخه مننه او قدردانی وکړ او د یاد سیمینار د محتوا په اړه یې هر اړخیز معلومات وړاندې کړل.
ښاغلي وحدت په خپل بیان کې د روژې مبارکې میاشتې فضیلت د قرآنی آیتونو او نبوي احادیثو په رڼا کې په مفصل شکل بیان کړ.
همدارنګه د کابل پولي تخنیک پوهنتون مالي او اداري مرستیال مولوي محمد یاسین حقاني او د دې پوهنتون د اسلامي ثقافت د څانګې امر مولوي عبدالکریم هم په خپلو خبرو کې د روژې مبارکې میاشتې د فضیلت په اړه هر اړخیز معلومات وړاندې کړل.
دوی زیاته کړه، چې نوموړې میاشت د مسلمانانو لپاره لوی فرصت دی تر څو ښه شکل د اللهﷻ دغه عبادت ترسره کړي.
د يادونې وړ ده، چې ياد سيمينار د کابل پولي تخنيک پوهنتون د محصلينو د خدمتونو آمریت په همغږۍ او همکارۍ جوړ شوى و.
سیمینار د دعایې په ویلو سره پای ته ورسید.
