د کابل پولي تخنیک پوهنتون د فوټسال سیالیو پای لوبه ترسره شوه
د کابل پولي تخنیک پوهنتون د فوټسال ټیمونو ترمنځ د فوټسال سیالۍ چې څه موده وړاندې پیل شوې وې، د جیولوجي او کانونو پوهنځي د فوټسال ټیم په اتلولۍ سره پای ته ورسېدې
په یادو سیالیو کې د ترانسپورتي ودانیو پوهنځي دویم او د کمیاوي صنایو انجنیری پوهنځي دریم مقام خپل کړ
د لوبې له پای ته رسېدو وروسته د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال میلمنو او ورزشکارانو ته ښه راغلاست ووایه او د جیولوجي او کانونو پوهنځي د فوټسال ټیم ته یې په سیالیو کې د اتلولۍ له امله مبارکي وویله او ټولو ورزشکارانو ته یې د بریالیتوب هیله وکړه
ورپسې د لوړو زده کړو وزارت د سپورت عمومي مدیر سید انورشاه سعادت د دې سیالیو ګټونکې لوبډلې ته د مبارکي ترڅنګ د دغه ډول سیالیو او ورزشي پروګرامونو ترسره کول یې د کابل پولي تخنیک پوهنتون لپاره لویه لاسته راوړنه وبلله او په راتلونکي کې یې د هر راز همکارۍ ژمنه وکړه
همدارنګه يو تن ورزشکار هم په خپلو خبرو کې د دغو سياليو په ترسره کيدو خوښي څرګنده کړه
د یادونې وړ ده چې د سیالیو غوره ګول ساتونکی زبید الله د شپې پوهنځی څخه، غوره ګول وهونکی عبدالله د جیولوجي او کانونو پوهنځی څخه او دسیالیو غوره لوبغاړی محمد حسین د ترانسپورتي او ساختماني پوهنځی څخه ونومول شول
دغه مراسم د کابل پولي تخنیک پوهنتون د رهبرۍ له خوا د جیولوجي او کانونو پوهنځي د فوتسال ټیم ته د اتلولۍ جام په ورکولو او ورزشکارانو ته د ډالیو په ویشلو سره پای ته ورسیدل
