د کابل پولي تخنیک پوهنتون د تقاعد شويو استادانو او کارمندانو لپاره ستاینغونډه ترسره شوه.
غونډه د قرآنکریم د مبارکو آیتونو په تلاوت سره پیل شوه.
په یاده غونډه کې د کابل پولي تخنیک پوهنتون عمومي رئیس ښاغلي پوهنوال دیپلوم انجنیرعبدالرشید اقبال، د کابل پولي تخنیک پوهنتون لپاره د لوړو زده کړو وزارت ځانګړي استازي د مالي او اداري چارو مرستیال ښاغلي انجنیر زیارمل خطاب، علمي مرستیال ښاغلي پوهنوال دیپلوم انجنیر محمد نسیم نسیمي، د پوهنځيو رئیسانو، استادانو، آمرینو او کارمندانو ګډون کړی و.
لومړی د کابل پولي تخنیک پوهنتون عمومي رئیس ښاغلي پوهنوال دیپلوم انجنیر عبدالرشید اقبال ټولو ګدونوالو ته ښه راغلاست ووایه او د یادو استادانو او کارمندانو علمي او اداري فعالیتونه او لاسته راونو په اړه یې په تفصیل سره خبري وکړې.
نوموړي د یاد شویو استادانو د تالیف او ترجمې درسي کتابونه، جوړې شوې درسې ویډیوګانې د هیواد والو او خصوصاً د کابل پولي تخنیک پوهنتون د محصلینو لپاره لویه لاسته راوړنه وبلله، نوموړي یاد استادان تقاعد نه بلکې د خپل څنګ همیشني همکاران وبلل.
ورپسې د کابل پولي تخنیک پوهنتون لپاره د لوړو زده کړو وزارت ځانګړي استازي د مالي او اداري چارو مرستیال ښاغلي انجنیر زیارمل خطاب د دغه پوهنتون د استادانو او کارمندانو د فعالیتونو ستاینه وکړه.
نوموړي زیاته کړه موږ خوشبخته یو چې په ژوند کې د داسې کادرونو ستاینه کوؤ.
ښاغلي خطاب زیاته کړه استادان او علمي کادرونه باید خپلي تجربې د کتابونو، ژورنالونو او علمي مجلو له لاري له خلکو سره شریکي کړي نوموړي د استادانو خدمتونه د قرآنې آيتونو او احادیثو په رڼا کې صدقه جاریه وبلله.
همدا راز د کمپيوټر ساينس پوهنځي پخواني رئيس او د رياضياتو دیپارتمنت استاد پوهاند مرزا محمد مرزا د متقاعد شويو استادانو په استازيتوب خبرې وکړې نوموړي د خپلو خبرو په ترڅ کې د دغه ډول غونډو د جوړېدو مننه وکړه او د لوړو زده کړو په برخه کې یې د خپلو علمي فعالیتونو او کاري موقفونو په اړه هر اړخیز معلومات وړاندې کړل او د ټولو له شتون څخه یې مننه وکړه.
غونډه استادانو، کارمندانو، او کارکوونکو ته د ستاینلیکونو په ویشلو سره پای ته ورسیده.
