په کابل پولي تخنیک پوهنتون کې د لوړو زده کړو وزارت له خوا د لوړو زده کړو تعلیمي لار او د لوړو زده کړو تعلیمي مدیریت سیسټم (HELMS) په برخه کې درې ورځنی سیمینار پیل شو.
سیمینار د قرآنکریم د څو آیتونو په تلاوت سره پیل شو.
په پیل کې د لوړو زده کړو وزارت د علمي برنامو د پراختیا رئیس او د کابل پولي تخنیک پوهنتون سرپرست انجنیر سردار ولي صالحي استادانو او د سیمینار برخوالو ته پیلېزه او د ښه راغلاست وینا وکړه او یاد سیمینار یې د استادانو د تدریس په برخه کې د علمي ارتقا لپاره ښه فرصت یاد کړ او د سیمینار د تنظیمولو له امله یې د اړوند مسؤولینو څخه مننه او قدردانی وکړ.
ورپسې د لوړو زده کړو وزارت د علمي چارو مشاور ښاغلي خاورین د سیمینار د محتوا په اړه په تفصیل سره خبرې وکړې او ګډونوالو ته یې د سیمینار اهداف او ګټې تشریح کړې.
د یادونې وړ دی چې، یاد سیمینار د کابل پولی تخنیک پوهنتون، د کابل تعلیم او تربیې پوهنتون، ننگرهار پوهنتون او د بلخ پوهنتون د استادانو د علمي ارتقا لپاره د لوړو زده کړو وزارت د علمي پراختیا ریاست له خوا جوړ شوی چې په کې د یادو پوهنتونونو ۳۸ استادان ګډون لري او درې ورځې به دوام وکړي.
