د کابل پولي تخنیک پوهنتون د دعوت او ارشاد آمریت له خوا د انساناني قاچاق د مخنیوي او د امیرالمؤمنین (حفظهالله تعالی) فرمان تشریح شو.
د انسانانو د قاچاق له دې شومې پدیدې سره د اسلامي او انساني مسؤولیتونو په چوکاټ کې، د کابل پولي تخنیک پوهنتون د دعوت او ارشاد آمر مولوي نصرت الله سیرت د دې ادارې منسوبینو ته د انسان قاچاق د فردي، ټولنیزو او شرعي زیانونو په اړه بحث او عامه پوهاوی وکړ او د امیرالمؤمنین (حفظهالله تعالی) د صریح او واضح فرمان وضاحت هم وړاندې شو، چې پکې دا عمل غیرشرعي، غیرانساني او مطلقاً ممنوع ګڼل شوی دی.
مولوي نصرت الله سیرت د انسان د قاچاق په اړه د قرآن کریم د آیتونو او نبوي احادیثو په رڼا کې تفصیلي خبرې وکړې. نوموړي وویل چې انسان قاچاق نه یوازې یو ټولنیز او حقوقي جرم دی، بلکې دا د الله (ج) د بندګانو سره ښکاره ظلم او لوی خیانت هم دی.
نوموړي دا عمل د انساني کرامت او عزت د له منځه وړلو سبب وباله او زیاته یې کړه چې د شریعت له مخې مرتکبین یې د دنیا او آخرت سزاوو مستحق دي.
د دعوت او ارشاد آمر د امیرالمؤمنین (حفظهالله تعالی) فرمان مفصل تشریح کړ او یادونه یې وکړه چې اسلام د انسان د ژوند، مال، عزت او حقونو ساتنې ته ځانګړې پاملرنه لري او هر ډول غیر مشروع معامله، دوکه او استثمار په کلکه غندي او شرعاً حرام ګڼل کیږي.
د یادونې وړ ده چې د کابل پولي تخنیک پوهنتون د دعوت او ارشاد آمریت درسي برنامې د دیني پوهاوي د لوړولو په موخه هره ورځ د ټاکل شوي تقسیم اوقات له مخې منظم او دوامداره ترسره کیږي.
