په کابل پولي تخنیک پوهنتون کې د اداري اسنادو مدیریت او دفترداري په برخه کې د ظرفیت لوړونې پنځه ورځنی ورکشاپ پای ته ورسېد.

د دې ورکشاپ اختتاميه غونډه د کابل پولي تخنیک پوهنتون د مالي او اداري چارو مرستیال مولوي محمد یاسین حقاني، د پوهنتون د مختلفو اداري برخو آمرینو او د نويو ګومارل شویو کارکوونکو په ګډون کې ترسره شوه.

په پیل کې مولوي محمد یاسین حقاني د قرآن کریم د آیتونو او نبوي احادیثو په رڼا کې د علم او پوهې پر ارزښت خبرې وکړې، د علم زده کړه یې د فردي او ټولنیز پرمختګ لپاره اړینه وبلله او د لوړو زده کړو وزارت د کارکوونکو چارو ریاست اړوند د ظرفیت لوړونې آمریت استادانو څخه یې د دې ورکشاپ د تنظیم او وړاندې کولو له امله مننه وکړه.

محترم حقاني له کارکوونکو وغوښتل چې د دې ورکشاپ له زده‌کړو په عملي بڼه استفاده وکړي، د اداري ستونزو په حل کې یې تطبیق کړي، د خلکو او ټولنې خدمت ته د اخلاص او صداقت پر اساس دوام ورکړي.

همدارنګه، نوموړي د لوړو زده‌کړو وزارت او د کابل پولی‌تخنیک پوهنتون له رهبرۍ څخه د دې ډول ظرفیت لوړونې پروګرامونو د تنظیم له امله قدرداني وکړ او دا یې د اداراتو د لا پرمختګ او ښه فعالیت لپاره ګټور وبلل.

غونډه د تصدیق‌نامو د وېش او د دعايې په ویلو  سره پای ته ورسېده.