د کابل پولي تخنیک پوهنتون د ترانسپورتي ودانیو پوهنځي د ماسټرۍ برنامې د لومړي دور فارغینو دپروژو دفاع غونډه جوړه شوه

لومړی د کابل پولي تخنیک پوهنتون د ترانسپورتي ودانیو د پوهنځي رئیس ښاغلي پوهاند محمد نذیر نجابي له دغه پوهنځي څخه د ماسټرۍ برنامې د لومړۍ دورې فارغینو فراغت یو ارزښتناک ګام وباله او د یادې غونډې په اړه یې هر اړخیز معلومات وړاندې کړل.
همدارنګه د ترانسپورت او هوايي چلند وزارت د سړکونو چارو معین الحاج عبدالسلام حیدري د کابل پولي تخنیک پوهنتون د کادرونو او انجنیرانو روزل یوه ستره لاسته راوړنه وبلله او دا یې د هیواد د سوکالۍ، پرمختګ او د خلکو هوساینې لوی لامل یاد کړ.
ښاغلي حیدری ژمنه وکړه، چې د يادې دورې فارغینو ته به د ترانسپورت او هوايي چلند وزارت په بېلابېلو څانګو کې د کار زمینه برابروي او له وړتیا به یې ګټه پورته کوي.
د يادونې وړ ده، چې د دغه پوهنځي د ماسټرۍ برنامې د دفاع غونډه به درې ورځې دوام لري او په ترڅ کې به يې ٣٠ تنه له خپلو پروژو دفاع کوي، چې د ارزونې کمېټې له تاييد وروسته به د سندونو په ورکولو سره د ټولنې خدمت ته وړاندې کیږي.