په کابل پولي تخنیک پوهنتون کې د ۱۴۰۱ کال د امتحاناتو ملي ادارې له خوا د کانکور عمومي ازموینه واخیستل شوه.
غونډه د قران کریم د مبارکو آیاتونو په تلاوت سره پیل شوه.
په دې غونډه کې د لوړو زده کړو وزارت رهبري هئیت، د امتحاناتو ملي ادارې غړو، د کابل پولي تخنیک پوهنتون رهبري هئیت او استادانو هم حضور درلود.
لومړی د کابل پولي تخنیک پوهنتون رئیس محترم دیپلوم انجنیر عبدالرشید اقبال د ښه راغلاست تر څنګ په دغه ازموینه کې ټولو نوماندانو ته د شفافیت ډاډ ورکړ.
نوموړي د امتحاناتو ملي اداري او د وزارت رهبري هئیت سره په دغه ازموینه کې د هر راز همکاري ژمنه وکړه او ورسره څنګ کې یې په ازموینه کې ټولو نوماندانو ته د بریالیتوب هیله وکړه.
همدا راز د امتحاناتو ملي ادارې غړي پوهاند عبدالاحد مسلم په خپلو خبرو کې د کابل پولي تخنيک پوهنتون رهبري څخه د دوی د هر اړخیزې همکاري له امله مننه وکړه.
ښاغلي مسلم د کانکور ازموينې د اخيستلو د طرزالعمل په اړه هر اړخيز معلومات استادانو او د غونډې ګډونوالو ته وړاندې کړل.
دیادولو وړ ده چې سږ کال په کانکور ازموینه کې د کاندیدانو د جذب شمیر د تیر کال په پرتله دوه برابره ډیر دی.
په اخیر کې ازموینه د دعایې په ویلو سره پیل شوه.
د اړیکو او عامه پوهاوي آمریت
