د فکري او جسمي اعداد په موخه په کابل پولي تخنیک پوهنتون کې د والیبال سیالۍ پیل شوې
د کابل پولي تخنیک پوهنتون د پوهنځیو ترمنځ د والیبال سیالۍ د فکري او جسمي اعداد، روحي پیاوړتیا، د ورزشي استعدادونو د ودې او د محصلانو ترمنځ د سالمې سیالۍ د زمینې د برابرولو په موخه د ځانګړو ورزشي مراسمو په ترڅ کې د پوهنتون رهبرۍ، استادانو، محصلانو او ورزشکارانو په شتون کې پیل شوې.
د یادو سیالیو د پرانیستنې مراسمو کې د کابل پولي تخنیک پوهنتون عمومي رئیس ښاغلي مولوي محمد موسی فاروق د نبوي احادیثو په رڼا کې د ورزش د اهمیت په اړه خبرې وکړې او د انسان د بدن، فکر، هوډ او موخو په پیاوړتیا کې یې د ورزش پر رول ټینګار وکړ.
نوموړي څرګنده کړه چې مؤمن باید له جسمي او فکري پلوه پیاوړی وي، لوړ همت ولري او په خپلو موخو کې د لوړ عزم لرونکی وي.
ښاغلي فاروق د ورزش، زدهکړو او عبادت ترمنځ د توازن د رامنځته کولو پر اهمیت ټینګار وکړ او له محصلانو یې وغوښتل چې د ورزش ترڅنګ خپلو درسونو او عبادت ته هم لازم پام وکړي او له خپلې تحصیلي دورې څخه په غوره توګه ګټه واخلي.
همدارنګه د کابل پولي تخنیک پوهنتون د محصلانو چارو مرستیال انجنیر مفتاحالدین عزام ورزش د پرمختګ، مثبتې انګېزې د رامنځته کېدو او له منفي افکارو او روحي او رواني تشویشونو څخه د مخنیوي لامل وباله.
ښاغلي عزام محصلین د خپلې تحصیلي دورې له فرصتونو څخه اغېزمنې ګټې اخیستنې ته وهڅول او له هغوی یې وغوښتل چې د وخت له بې ځایه ضایع کولو څخه ډډه وکړي او د ورزشي فعالیتونو ترڅنګ خپلو شرعي مسؤلیتونو، درسونو او د خپلو نیتونو اصلاح ته جدي پاملرنه وکړي.
نوموړي همداراز په راتلونکي کې د محصلینو لپاره د نورو ورزشي پروګرامونو د جوړېدو خبر ورکړ او په دې برخه کې یې د پوهنتون د رهبرۍ له ملاتړ او همکارۍ څخه مننه او قدرداني وکړه.
د یادونې وړ ده چې د والیبال د پرانیستونکې سیالۍ له پیل څخه وړاندې، د پوهنتون د ورزشي چارو د آمر تر مشرۍ لاندې د رزمي ورزشونو ننداره هم ترسره شوه چې د ګډونوالو له تود هرکلي او پاملرنې سره مخ شوه
د مراسمو په پای کې د والیبال سیالیو لومړۍ لوبه د ساختماني انجنیري پوهنځي او جیولوجي او کانونو پوهنځي د لوبډلو ترمنځ ترسره شوه، چې په دې سره د کابل پولي تخنیک پوهنتون د پوهنځیو ترمنځ د والیبال سیالۍ په رسمي توګه پیل شوې.
